Shocking : जालना हादरलं! पैशांच्या देवाणघेवाणीवरून तरुणाची सटकली; महिलेचा गळा आवळला अन्...

अक्षय पाटील, जालना

पूर्वी एखादी वस्तू किंवा पैसे घेतल्यानंतर मोठ्या मनाने हात सैल करून ते परत दिले जायचे. जरी ती वस्तू किंवा पैसे द्यायला उशीर झाला तर सामंजस्याने त्याच्यावर तोडगा काढला जात होता. मात्र आता थोड्या थोडक्या कारणांवरून माणसांचा राग प्रकोपाला जाताना दिसतो. अशीच एक घटना जालनामधून समोर आली आहे. शेतशिवारात एका महिलेचा मृतदेह हत्या केलेल्या अवस्थेत सापडला. धक्कादायक म्हणजे पैशांच्या देवाणघेवाणीवरून ही हत्या झाल्याचं उघड झालं. या प्रकरणी पोलिसांनी तात्काळ सूत्रे हलवत आरोपीला अटक केली आहे. या घटनेनंतर परिसरात खळबळ उडाली असून आरोपीवर गुन्हा दाखल करण्यात आला आहे.

जालना जिल्ह्यातील हसनाबाद पोलीस ठाणे हद्दीतील खडकी गावाच्या शिवारात कपाशिच्या शेतात उषाबाई भास्कर सदाशीवे या ४० वर्षीय महिलेचा मृतदेह आढळून आल्याने खळबळ उडाली होती. हसनाबाद पोलिसांनी तात्काळ घटनेचे गांभीर्य लक्षात घेत तपासाची चक्र वेगाने फिरवली. गुन्ह्यातील अज्ञात व्यक्तीचा शोध घेत असताना गुप्त बातमीदारांमार्फत पोलिसांना मिळालेल्या माहितीनुसार, मयत महिलेचा चांदई टेपले येथील शरद शिवाजी राऊत चांदई टेपले यांच्यामध्ये पैशाची देवाणघेवाण असल्याची माहिती समोर आली.

त्यांनतर आरोपीचा मोबाईल नंबर हस्तगत करून त्याचं टॉवर लोकेशन वरून ठावठिकाणा शोधण्यात आला. त्याचं लोकेशन जावळेवाडी शिवारातील शेतातील घरी असल्याचे दिसून आले. पोलिसांनी त्याच्या घरी धाव घेतली, शिवाय त्याला तात्काळ संशयित म्हणून ताब्यात घेत त्याची सखोल विचारपूस केली. या चौकशीदरम्यान आरोपीने आपणच हा गुन्हा केल्याची कबुली दिली पोलिसांसमोर आहे.

पैशाच्या देवाण-घेवाणी मधून आरोपी आणि मृत महिलेमध्ये काही दिवसापूर्वी वाद असल्याची माहिती आरोपीने पोलिसांना दिली आणि त्यातूनच आरोपीने हत्या केल्याचं म्हटलं. आरोपीने महिलेचा स्कार्पने गळा आवळून हत्या केली यानंतर मृतदेह कपाशीच्या शेतात टाकून तो पळून गेला. याप्रकरणी पोलिसांनी काही तासातच आरोपीला ताब्यात घेतलं असून त्या विरुद्ध हसनाबाद पोलीस ठाण्यात गुन्हा दाखल करण्यात आला आहे. दरम्यान या प्रकरणी आता पोलीस पुढील तपास करीत आहेत.