Shocking News: एक्स गर्लफ्रेंडची छेड काढली, नंतर जबरदस्ती किस करण्याचा प्रयत्न; तरुणीने तरुणाच्या जीभेचा तुकडाच पाडला

उत्तर प्रदेशातील कानपूरमध्ये भयंकर घटना घडली. एका तरुणाने लग्नानंतर एक्स गर्लफ्रेंडची छेड काढत तिला जबरदस्ती किस करण्याचा प्रयत्न केला. संतापलेल्या तरुणीने या तरुणाला आयुष्याची अद्दल घडवली. तरुणीने तरुणाच्या जीभेचा तुकडाच पाडला. ही घटना बिल्हौर जिल्ह्यातील दरियापूर गावात घडली. या घटनेची चर्चा आता सर्वत्र होत आहे.

बिल्हौर पोलिस ठाण्याच्या हद्दीत येणाऱ्या दरियापूर गावात राहणारी तरुणी चुलीसाठी माती गोळा करण्यासाठी एका तलावावर गेली होती. त्याठिकाणी गावामध्ये राहणारा ३५ वर्षीय तरुण आला. हा तरुण तरुणीचा एक्स बॉयफ्रेंड आहे. त्याने आधी तरुणीची छेड काढली. त्यानंतर त्याने तिला जबरदस्ती किस करण्याचा प्रयत्न केला. तरुणीने त्याच्या जीभेचा लचका तोडला. या घटनेत जखमी झालेल्या तरुणाला कानपूरमधील हॅलेट रुग्णालयात उपचारासाठी दाखल करण्यात आले आहे. पोलिसांनी या प्रकरणी गुन्हा दाखल करत तपास सुरू केला आहे.

बिल्हौर पोलिस स्टेशनचे प्रभारी अशोक कुमार सरोज यांनी सांगितले की, दरियापूर येथील रहिवासी असलेल्या ३५ वर्षीय तरुणाचे त्याच्या गावातील एका तरुणीशी प्रेमसंबंध होते. तरुणीच्या कुटुंबीयांचा या प्रेमसंबंधाला विरोध होता. त्यामुळे तरुणीने या तरुणासोबत बोलणं बंद केले आण त्याच्यापासून ती दूर राहू लागली. या तरुणीच्या कुटुंबीयांनी तिचे लग्न दुसऱ्या तरुणासोबत ठरवले. त्यामुळे तरुण नाराज झाला होता. तो तिला सतत भेटण्याचा प्रयत्न करत होता.

सोमवारी दुपारी तरुणी चुलीसाठी माती गोळा करण्यासाठी तलावावर गेली होती. तिला एकटी पाहून तरुण तिथे गेला आणि तो तिची छेड काढू लागला. तिने प्रतिकार केला पण त्याने नकार दिला आणि तिला जबरदस्तीने किस करू लागला. या वेळी तरुणीने तरुणाची जीभ दातांनी तोडली. तरुणीने तरुणाच्या जीभेचा इतक्या जोरात चावा घेतला की त्याचे दोन भाग झाले.

परिसरातील ग्रामस्थांनी ही घटना पाहिली. त्यांनी जखमी तरुणाच्या कुटुंबाला माहिती दिली. तरुणाच्या कुटुंबाने त्याला ताबडतोब रुग्णालयात नेले. प्राथमिक उपचार दिल्यानंतर डॉक्टरांनी त्याला कानपूरमधील हॅलेट रुग्णालयात हलवण्यास सांगितले. या प्रकरणी पोलिसांनी गुन्हा दाखल केला असून पुढील कायदेशीर कारवाई केली जात आहे.