Accident: लग्नाला जाताना काळाचा घाला! भरधाव कार दरीत कोसळली, ३ शिक्षकांचा मृत्यू

Summary -

• लग्नाला जाताना काळाचा घाला

• भरधाव कार दरीत कोसळून ३ शिक्षकांचा मृत्यू

• अपघात नैनीतालच्या रातीघाटात झाला

• कार दरीत कोसळून शिप्रा नदीत पडली.

उत्तराखंडच्या नैनितालमध्ये भयंकर रस्ते अपघात झाला. भरधाव कार दरीत कोसळली. या अपघातामध्ये तीन शिक्षकांचा जागीच मृत्यू झाला तर एक जण जखमी झाला. अपघाताची ही घटना शनिवारी रात्री सात वाजताच्या सुमारास घडली. हे सर्व शिक्षक लग्नसमारंभासाठी जात होते. पण वाटेतच काळाने घाला घातला. पोलिसांनी घटनास्थळी धाव घेत मदतकार्य करत एका जखमी शिक्षकाला उपचारासाठी रुग्णालयात दाखल केले.

मिळालेल्या माहितीनुसार, अपघातामध्ये मृत्यू आणि जखमी झालेले शिक्षक अल्मोडाहून हल्दानी येथे लग्नासाठी चालले होते. पण वाटेतच या शिक्षकांच्या कारला भीषण अपघात झाला. अपघाताची ही घटना उत्तराखंडच्या नैनीताल जिल्ह्यातील रातीघाटात घडली. कार रातीघाटामध्ये अनियंत्रित झाली. चालकाचे कारवरील नियंत्रण सुटले आणि कार दरीत कोसळून शिप्रा नदीत पडली.

अपघाताची माहिती मिळताच स्थानिक पोलिस आणि एसडीआरएफच्या टीमने घटनास्थळी धाव घेतली आणि रेस्क्यू ऑपरेशन केले. या अपघातामध्ये ३ शिक्षकांचा मृत्यू झाला. तर एक शिक्षक जखमी झाला आहे. मृतांमध्ये सुरेंद्र भंडारी, पुष्कर भैसोडा आणि संजय बिष्ट यांचा समावेश आहे. तर मनोज कुमार हे जखमी झाले असून त्यांच्यावर हल्दानीतील हायर सेंटरमध्ये उपचार सुरू आहेत.

पोलिसांनी सांगितले की, रातीघाटातील वळणावर समोरून येणाऱ्या गाडीला ओव्हरटेक करण्याचा प्रयत्न करत असताना शिक्षकांची कार अनियंत्रित झाली. ही कार दरीत कोसळून शिप्रा नदीत पडली. अपघातामध्ये चार शिक्षकांपैकी तीन शिक्षकांचा मृत्यू झाला. स्थानिक नागरिकांनी सांगितले की, रस्त्याच्या कडेला संरक्षण भिंत असली असती तर कार दरीत कोसळली नसती. महत्त्वाचे म्हणजे, गेल्या चार वर्षांत याच ठिकाणी पाच मोठे अपघात झाले आहेत.