मोठी बातमी! भाजपची ताकद वाढली, ३ आमदारांनी केला पक्षप्रवेश; राजकीय वर्तुळात खळबळ

Punjab AAP MLAs latest news : पंजाब विधानसभा निवडणुकीपूर्वी अरविंद केजरीवाल यांच्या आप पार्टीला राजकीय धक्का बसला आहे. पक्षाच्या ३ बंडखोर आमदारांनी 'आप'च्या प्राथमिक सदस्यत्वाचा राजीनामा दिल्यानंतर थेट नवी दिल्लीतील भाजपच्या मुख्यालयाबाहेर 'भाजप जिंदाबाद'च्या घोषणा दिल्या आहेत. त्यांनी आज अधिकृरित्या भाजपमध्ये प्रवेश केला.

भगवंत मान सरकार ड्रग्सचा विळखा आणि वाढत्या कर्जासारखे प्रश्न सोडवण्यात अपयशी ठरल्याचा आरोप करत या आमदारांनी राजीनामा दिला होता. त्यानंतर पंजाबच्या राजकारणात मोठी उलथापालथ पाहायला मिळाली. २०२७ च्या विधानसभा निवडणुकीच्या पार्श्वभूमीवर हरमीत सिंग पठाणमाजरा, चेतन सिंग जौरामजरा आणि कुंवर विजय प्रताप सिंग यांनी आज भाजपमध्ये प्रवेश केला.

औपचारिक पक्षप्रवेशासाठी तिन्ही आमदार दिल्लीतील भाजप मुख्यालयात आज सकाळी दाखल झाले. एएनआय या वृत्तसंस्थेने शेअर केलेल्या एका व्हिडिओमध्ये पठाणमाजरा आणि जौरामजरा पक्षाच्या कार्यालयात 'भाजप जिंदाबाद'च्या घोषणा देताना दिसत आहेत. रविवारी पठाणमाजरा आणि जौरामजरा यांनी 'आप'च्या प्राथमिक सदस्यत्वाचा राजीनामा दिला होता. तर आपचे निलंबित आमदार आणि माजी आयपीएस अधिकारी कुंवर विजय प्रताप सिंह यांनी सोमवारी भाजपमध्ये सामील होण्यापूर्वी पंजाब विधानसभेचा राजीनामा दिला. त्यानंतर तिन्ही आमदारांनी आज भाजपमध्ये अधिकृत प्रवेश केला.

अमृतसर उत्तरचे प्रतिनिधित्व करणारे कुंवर विजय प्रताप सिंह, समानाचे चेतन सिंह जौरामजरा आणि पंजाबच्या पतियाळा जिल्ह्यातील सानौरचे हरमीत सिंह पठाणमाजरा हे तीन नेते आहेत. दरम्यान, आपने शनिवारी ४० उमेदवारांची पहिली यादी जाहीर केली. त्यात धुरीमधून मुख्यमंत्री भगवंत मान, कोट कपूरामधून विधानसभा अध्यक्ष कुलतार सिंग संधवान आणि पश्चिम लुधियानामधून तुरुंगवासी मंत्री संजीव अरोरा यांचा समावेश आहे. पहिल्या उमेदवारीच्या यादीत तिन्ही नेत्याचा समावेश नव्हता.