तक्रारदाराला बड्या नेत्यानं संपवलं, चारचाकीनं चिरडलं; पोलिसांनी बेड्या ठोकल्या

तामिळनाडूमधून एक धक्कादायक बातमी उघडकीस आली आहे. डीएमके नेत्याला कारने एका व्यक्तीला चिरडल्याच्या आरोपाखाली अटक करण्यात आली आहे. पलानीस्वामी हे दुचाकीवरून जात होते. यादरम्यान डीएमके नेत्याच्या चारचाकी वाहनानं दुचाकीला उडवलं. तसेच दुचाकीस्वाराला चिरडलं. सुरूवातीला हे प्रकरण हिट अँड रन असल्याची माहिती समोर आली होती. मात्र, तपासानंतर धक्कादायक माहिती समोर आली.

विनायगम पलानीस्वामी असे आरोपीचे नाव आहे. ते तामिळनाडूतील तिरूपूर जिल्ह्यातील पंचायत अध्यक्ष असल्याची माहिती आहे. तर, पलानीस्वामी असे मृत व्यक्तीचे नाव आहे. पोलिसांनी दिलेल्या माहितीनुसार, पलानीस्वामी दुचाकीवरून गावाच्या दिशेनं जात होते. दरम्यान, विनायगम पलानीस्वामी हे दुचाकीच्या मागून चारचाकीवरून आले.

चारचाकीने दुचाकीला जोरदार धडक दिली. तसेच दुचाकीस्वाराला चिरडले. सुरूवातीच्या तपासात डीएमकेचे नेते त्यावेळी मद्यधुंद अवस्थेत होते, अशी माहिती समोर आली होती. त्यामुळे हे प्रकरण हिट अँड रन असावे, असा अंदाज व्यक्त केला जात होता. मात्र, पुढील तपासात कुटुंबाने संशय, तसेच या घटनेमागे वैयक्तिक वैर असल्याची शक्यता व्यक्त केली.

एका पोलीस अधिकाऱ्यांनी दिलेल्या माहितीनुसार, मृत व्यक्तीचे डीएमके नेत्याशी काही दिवसांपासून गंभीर मतभेद होते. त्यांनी खासगी रस्त्याची मालकी पंचायतीला देण्यास विरोध केला होता. या कारणावरून वाद निर्माण झाला होता. याच वादामुळे संबंधित व्यक्तीची हत्या केली असल्याची शक्यता आहे.

या प्रकरणी पोलिसांनी तात्काळ तपासाला सुरूवात केली. या प्रकरणात तपास करून आरोपीला अटक करण्यात आली आहे. न्यायालयाने आरोपीला न्यायालयीन कोठडी सुनावली आहे.