मद्यपींना महागाईचा चटका! देशी - विदेशी दारू महागली, विक्रीत जबरदस्त घट

सोलापूर जिल्ह्यात दारू विक्रीत लक्षणीय घट झाली आहे. दारूच्या किमतीत वाढ झाल्याकारणामुळे दारूच्या किमतीत बदल पाहायला मिळत आहे. ऑगस्ट २०२४ मध्ये विदेशी दारूची विक्री ८ लाख १३ हजार १८४ लिटर दारूची विक्री झाली होती. मात्र, २०२५ च्या ऑगस्ट महिन्यात केवळ ५ लाख ७४ हजार १ लिटर इतकी विक्री झाली आहे. दरम्यान, देशी दारू, वाईन आणि बिअरच्या विक्रीतही घट झाली आहे.

दरवाढीमुळे दारूच्या खपात घट

राज्य सरकारने यावर्षी देशी विदेशी दारूच्या दरात वाढ केली आहे. १८० एमएल देशी दारूची बाटली ८० रूपयांवर गेली आहे. तर, भारतीय बनावटीची दारू २५० रूपयांवरून थेट ३६० रूपयांना विकली जात आहे. म्हणजेच ११० रूपयांची वाढ झाली आहे. याशिवाय हॉटेल - रेस्टॉरंटमध्ये विदेशी दारू विक्रीवर १५ ते २० टक्के अतिरिक्त शुल्क आकारले जात आहे.

या दरवाढीमुळे मद्यपींनी दारूचे व्यसन कमी केले आहे. याचा थेट परिणाम विक्रीवर झाला आहे. सोलापूर जिल्हात जुलै महिन्यात १३ हजार ७३४ लिटरने विक्री घटली होती. तर, जुलै - ऑगस्टदरम्यान, ही घट तब्बल ३ लाख ६६ हजार लिटरपर्यंत पोहोचली असल्याची माहिती आहे.

सोलापूर जिल्ह्यात दरवर्षी सुमारे ३५० ते ४५० कोटींची दारू विक्री होत असते. मात्र, यंदा खप घटलेला असताना राज्य शासनाने देशी आणि विदेशी दारूच्या दरात वाढ केली आहे. तसेच विक्रीवरील अतिरिक्त शुल्कातही वाढ केली आहे. यामुळे १८० मिलिलिटर देशी - विदेशी दारूच्या बाटलीच्या दरात लक्षणीय वाढ झाली आहे. तब्बल ८० ते १६० रूपयांपर्यंत वाढ केली आहे. याच कारणामुळे मद्यपींनी दारूच्या दुकानाकडे पाठ फिरवली आहे.

गतवर्षी उत्पादन शुल्क विभागाला २६० कोटींचे उद्दिष्ट दिले होते. त्यावर्षी दर स्थिर असल्याकारणाने ३८५ कोटी रूपयांचा महसूल मिळाला होता. यंदा मात्र, दारूच्या दरात वाढ झाल्याने विक्रीत घट झाली आहे. असे असतानाही दुप्पट उद्दिष्ट म्हणजेच ५१० कोटींच्या महसुलाचे टार्गेट दिले आहे. यामुळे उत्पादन शुल्क विभागाच्या अधिकाऱ्यांसमोर मोठे आव्हान उभे राहिले आहे.