सोनम वांगचुक यांचा रुग्णालयातून संदेश, 20 जुलैला भारताचं दुसरं स्वातंत्र्य आंदोलन, मोदी सरकारचं टेंशन वाढलं

रोहित कदम, साम टीव्ही

गेल्या 20 दिवसांपासून उपोषणाला बसलेले सोनम वांगचुक यांना दिल्ली पोलिसांनी आंदोलनस्थळावरून जबरदस्तीने उचलत थेट रुग्णालयात नेलं. दिल्ली पोलिसांच्या या कारवाईमुळे जंतरमंतरवर मोठा गोंधळ उडाला होता. वांगचुक यांना रुग्णालयात डांबल्यानंतर आता कॉक्रोज जनता पार्टीचे अभिजीत दिपके यांनी अन्नत्याग आंदोलन सुरू केल्यामुळे हे आंदोलन अधिकच चिघळण्याची शक्यता निर्माण झालीये. त्यातच सोनम वांगचुक यांनी रुग्णालयातून एक संदेश दिलाय.

वांगचुकांचा संदेश

स्वातंत्र्याचं दुसरं आंदोलन. भयमुक्त भारत, अन्यायमुक्त भारत

अन्यायाविरोधातील स्वातंत्र्यासाठी(पेपरफुटी प्रमाणे), भीतीपासूनही मुक्ती (मी बेकायदेशीररित्या ताब्यात).

भारतातील स्वातंत्र्याचा दुसरा लढा. संसदेवरील मोर्चाला मोठ्या प्रमाणात यशस्वी करा. मला बेकायदेशीरपणे रुग्णालयात नेलंय. हा संदेश मी गीतांजलीमार्फत तुमच्यापर्यंत पोहोचवतोय.

सोनम वांगचुक आंदोलनात सहभागी होऊ शकले नाही तर मी स्वत: आंदोलनात सहभाग होणार, असा इशारा त्यांच्या पत्नी गीतांजली यांनी दिलाय. एव्हंढच नाहीतर वांगचुक यांना जंतर-मंतरवरून हटवल्याचा वाद आता थेट सर्वोच्च न्यायालयातही पोहोचलाय... विद्यार्थ्यांच्या भविष्यासाठी आणि मौलिक अधिकारांच्या रक्षणासाठी तातडीनं हस्तक्षेप करण्याची मागणी करण्यात आलीये. दुसरीकडे, सोनम वांगचुक यांना जंतर-मंतरवरून हटवल्यावरून राहुल गांधींनी केंद्र सरकारवर हल्लाबोल केलाय.

सोनम वांगचुक यांच्या दिल्लीतील आंदोलनाची धग थेट महाराष्ट्रातही पोहोचलीये. दादरमध्ये शिवाजी पार्कमध्ये ठाकरेसेनेकडून वांगचूक यांच्या समर्थनार्थ आंदोलन करण्यात आलं. मुंबईसह राज्यात विविध ठिकाणी तरुणांकडून आंदोलन करण्यात येतंय. सोनम वांगचुक यांना पाठींबा देण्यासाठी देशाच्या कानाकोपऱ्यातून लोक दिल्लीकडे निघालेत. मात्र 20 जुलैच्या संसदेवरील मोर्च्यासाठी सीजेपीने अद्याप परवानगी मागितलेली नसल्याची माहिती सुत्रांनी दिलीये. दरम्यान संसदेत सोमवारपासून सुरु होणाऱ्या पावसाळी अधिवेशनात विरोधक मोदी सरकारला धारेवर धरणार हे निश्चित...