Shocking: ६ मुलांचा बाप अल्पवयीन मुलीच्या प्रेमात वेडा, रेल्वे रूळाजवळ आढळले दोघांचे मृतदेह; नेमकं काय घडलं?

उत्तर प्रदेशच्या बागपतमधून धक्कादायक घटना समोर आली आहे. याठिकाणी प्रेमसंबंधाचा भयंकर शेवट झाला. सहा मुलांचा ३८ वर्षीय बाप १७ वर्षीय अल्पवयीन मुलीच्या प्रेमात वेडा झाला. दोघांनी विष प्राशन करून आत्महत्या केली. रेल्वे रूळाजवळ दोघेही बेशुद्धावस्थेत आढळले होते. दोघांना उपचारासाठी रुग्णालयात दाखल करण्यात आले. पण उपचारादरम्यान दोघांचाही मृत्यू झाला.

मिळालेल्या माहितीनुसार, ही खळबळजनक घटना बरौत परिसरातील बिजरौल रेल्वे स्थानकाजवळ घडली. रविवारी सकाळी स्थानिक नागरिकांना रेल्वे रुळाजवळ दोन जण बेशुद्धावस्थेत पडलेले दिसले. दोघांच्याही तोंडातून फेस येत होता आणि त्यांची प्रकृती गंभीर होती. रेल्वे स्टेशनच्या मास्टरने तात्काळ पोलिसांना घटनेची माहिती दिली. पोलसांनी घटनास्थळी धाव घेत दोघांनाही रुग्णालयात उपचारासाठी दाखल केले. दोघांची प्रकृती गंभीर असल्यामुळे डॉक्टरांनी त्यांना पुढील उपचारासाठी मेरठला हलवण्यास सांगितले. पण उपचारादरम्यान दोघांचाही मृत्यू झाला.

पोलिसांनी सांगितले की, मृत मुलगी १७ वर्षांची होती आणि ती शामली जिल्ह्यात राहणारी होती. तिचा प्रियकर देशपाल (३८ वर्षे) हा देखील याच जिल्ह्यात राहत होता. देशपाल सहा मुलांचा बाप होता आणि तो त्याच्या कुटुंबीयांसोबत राहत होता. दोघेही एका वीटभट्टीवर मजूर म्हणून काम करत होते. काम करता करता दोघांची जवळीक वाढली आणि ते एकमेकांच्या प्रेमात पडले. देशपाल विवाहित असताना देखील अल्पवयीन मुलगी त्याच्या प्रेमात वेडी झाली. दोघेही एकमेकांच्या घरी येत जात होते. त्यामुळे दोघांच्या कुटुंबीयांना त्यांच्या नात्याबद्दल कळाले होते.

अल्पवयीन मुलगी आणि देशपाल गेल्या ३ दिवसांपासून बेपत्ता होते. मुलीच्या कुटुंबीयांनी पोलिस ठाण्यात धाव घेत ती बेपत्ता असल्याची तक्रार दाखल केली होती. तिचे कुटुंबीय सगळीकडे तिचा शोध घेत होते. याचदरम्यान त्यांना देशपाल आणि ती मुलगी रेल्वे रूळावर बेशुद्धावस्थेत पडल्याची माहिती मिळाली. त्यानंतर सर्वांनी घटनास्थळी धाव घेतली. दोघांनाही रुग्णालयात नेण्यात आले. पण उपचारादरम्यान त्यांचा मृत्यू झाला. दोघांनी आत्महत्या केली की त्यांना कुणी जबरदस्तीने विष पाजण्याचा प्रयत्न केला. या सर्व बाजूने पोलिस तपास करत आहेत.