Mayurbhanj Shocking : संतापजनक! 80 किमीपर्यंत नेलं, तरुणीवर सामूहिक अत्याचार करून धावत्या कारमधून फेकलं

ओडिशाच्या मयूरभंजमध्ये सामूहिक अत्याचार झाल्याची घटना घडली आहे. मयूरभंजमध्ये शनिवारी सुदूर बांगिरीपोशी पोलीस स्टेशनच्या हद्दीत उदला-बालासोर राज्य राजमार्गावर वाहनात तरुणीवर अत्याचार केल्याची घटना घडली. तरुणीवर सहा जणांनी आळीपाळीने अत्याचार केल्याचं उघड झालंय. अत्याचारानंतर पीडित तरुणीला कारमधून फेकून दिलं. तरुणीवरील अत्याचारानंतर पुन्हा देशात महिला सुरक्षेचा प्रश्न निर्माण झाला आहे.

पोलिसांनी दिलेल्या माहितीनुसार, उदला पोलीस स्टेशनमध्ये जाऊन पीडित तरुणीने पोलिसांत तक्रार दिली. तक्रारीनुसार, बांगिरीपोशी येथील घरी येऊन दोघांनी नोकरीचं आश्वासन दिलं. त्यानंतर दोघांनी बाहेर नेऊन कारमध्ये बसवलं. याच कारमध्ये आणखी तीन जण बसले होते. तर सहावा व्यक्ती कार चालवत होता. तरुणीला ८० किलोमीटरपर्यंत दूरवर नेल्यानंतर एका सामसूम जागी कार थांबवली. त्यानंतर कार थांबवून तिच्यावर अत्याचार केला.

कारमधून फेकून दिल्यानंतर तरुणीने कुटुंबीयांशी संपर्क साधला. त्यानंतर पीडित तरुणीच्या नातेवाईकांनी अत्याचाराविषयी तातडीने पोलिसांना माहिती दिली. त्यानंतर पोलिसांनी दखल घेऊन कारवाईला सुरुवात केली.पोलिसांनी ६ आरोपींची ओळख पटवली आहे. ६ आरोपींना अटक करण्यासाठी पोलिसांनी पुढील तपास सुरु केला आहे.

वरिष्ठ पोलिस अधिकाऱ्यांनी दिलेल्या माहितीनुसार, आम्ही दोघांना ताब्यात घेतलं आहे. पीडित कुटुंबाने ५ जणांच्या विरोधात गुन्हा नोंदवला. पोलिसांनी आरोपींवर कलम ३५२ अंतर्गत गुन्हा नोंदवला आहे. आम्ही या प्रकरणाचा तपास सुरु केला आहे. या प्रकरणात सामील झालेल्या तिघांच्या मुसक्या आवळण्यासाठी तपास सुरु केला आहे'.