राजस्थानच्या जयपूरमधून एक धक्कादायक व्हिडिओ समोर आला आहे. जयपूरमधील एका सरकारी शाळेतील शिक्षिकेने विद्यार्थ्यांकडून तिच्या पायाची मालिश करून घेतली. हा व्हिडिओ सध्या सोशल मीडियावर तुफान व्हायरल होत आहे. हा व्हिडीओ पाहून नेटकरी संतप्त झाले आहेत. त्याचसोबत शिक्षण व्यवस्थेवर गंभीर प्रश्न उपस्थित केले जात आहेत. हा व्हिडीओ पाहून तुमच्या देखील रागाचा पारा चढेल.
व्हायरल होणारा हा व्हिडिओ करतारपूर येथील सरकारी उच्च प्राथमिक शाळेतील असल्याची माहिती समोर आली आहे. व्हिडिओमध्ये दिसत आहे की, शिक्षिका वर्गात जमिनीवर उलटी झोपली आहे. एक विद्यार्थी शिक्षिकेच्या पायावर उभे राहून तिला मालिश करून देत आहे. तर दुसरा विद्यार्थी तिथेच उभं राहून हा विद्यार्थी पडू नये यासाठी त्याला आधार देताना दिसत आहे. हा व्हिडीओ पाहून नेटकऱ्यांना मोठा धक्का बसला असून ते या घटनेचा निषेध करत आहेत.
शाळेच्या मुख्याध्यापिका अंजू चौधरी यांनी या घटनेला दुजोरा दिला आहे. मात्र त्यांना या विशिष्ट घटनेबद्दल काहीही माहिती नसल्याचा दावा केला आहे. त्यांनी सांगितले की, 'शिक्षिकेची तब्येत बिघडली असावी आणि तिने मुलांना तिला मदत करण्यास सांगितले असावे. मात्र, या प्रकरणाची चौकशी करून दोषींवर कारवाई केली जाईल.' या घटनेनंतर शिक्षण विभाग आणि शाळा प्रशासनावर प्रश्न उपस्थित होत आहेत. याप्रकरणी कठोर कारवाई करून दोषींना सोडू नये, अशी मागणी नागरिकांमधून होत आहे. या घटनेमुळे पुन्हा एकदा शिक्षकांची जबाबदारी आणि विद्यार्थ्यांसोबतच्या वागणुकीवर प्रश्नचिन्ह निर्माण झाले आहे.
व्हायरल होणाऱ्या या व्हिडिओवर नेटकऱ्यांनी संतप्त प्रतिक्रिया दिल्या आहेत. एका युजरने लिहिले की, 'अशा घटनांमुळे शिक्षण व्यवस्थेतील गंभीर त्रुटी दिसून येतात.' दुसऱ्या युजरने लिहिले की, 'शिक्षकांनी मुलांशी आदराने वागले पाहिजे.' तिसऱ्या युजरने लिहिले की, 'या घटनेचा मुलांच्या मनावर विपरीत परिणाम होऊ शकतो. शिक्षण विभागाने याप्रकरणी कठोर कारवाई करून भविष्यात अशा घटना टाळण्यासाठी पावले उचलली पाहिजेत.'
Read Marathi news and watch Live TV. Breaking news from Maharashtra, India, Pune, Mumbai, Politics, Entertainment, Sports, Lifestyle at SaamTV. Get Live Marathi news on Mobile. Download the Saam Tv app for Android and IOS.