Bus Caught Fire: दिल्ली-जयपूर राष्ट्रीय महामार्गावर खासगी बसने घेतला पेट; जीव वाचवण्यासाठी प्रवाशांनी बसमधून मारल्या उड्या

Gurugram Private Bus Caught Fire:

गुरुग्राममधील स्टार मॉलजवळ असलेल्या राष्ट्रीय महामार्ग ४८ वर एका खासगी स्लीपर बसला आग लागल्याची भीषण घटना घडलीय. या दुर्घटनेत दोन प्रवाशांचा मृत्यू झाला असून अनेक प्रवासी जखमी झाले आहेत. या अपघातामुळे महामार्गावरही मोठी वाहतूक कोंडी झाली.

किमान १० ते १२ प्रवाशांनी बसमधून उडी मारून आपला जीव वाचवला. घटनेची माहिती मिळताच पोलीस, अग्निशमन दल आणि रुग्णवाहिका घटनास्थळी दाखल झाल्या आहेत. आगीत होरपळलेल्या लोकांना उपचारासाठी जवळच्या रुग्णालयात दाखल करण्यात आले आहे.

ही बस दिल्लीहून जयपूरला जात होती. गुरुग्रामच्या सेक्टर ३१ जवळ ही बस आली असताना बसने पेट घेतला. या दुर्घटनेमुळे राष्ट्रीय महामार्गावर वाहतूक कोंडी झाली होती. बसने पेट घेतल्याचे दृश्य अनेकांनी आपल्या मोबाईलमध्ये कैद केले आहेत. हे व्हिडिओ सोशल मीडिया मोठ्या प्रमाणात व्हायरल झाले आहेत.