भारताचा शेजारचा देश हादरला; भूकंपाच्या धक्क्यामुळे सगळंच उद्ध्वस्त, ७ जणांचा मृत्यू, १०० हून अधिक ढिगाऱ्यात अडकले

अफगाणिस्तानमधून मोठी बातमी समोर येत आहे. ऑगस्ट महिन्यानंतर आज पुन्हा एकदा अफगाणिस्तानला भूकंपाचा जोरदार धक्का बसला आहे. उत्तर अफगाणिस्तानमध्ये ६.३ रिश्टर स्केल भूंकपाचे हादरे बसले आहेत. मिळालेल्या माहितीनुसार, या घटनेत किमान सात जणांचा मृत्यू झाल्याची माहिती आहे. तर, १०० हून अधिक लोक जखमी आहेत. त्यांना तातडीने रूग्णालयात उपचारासाठील हलवण्यात आलं आहे. भूकंपानंतर (USGS)ने त्यांच्या पेजर सिस्टमद्वारे या भागांत ऑरेंज अलर्ट जारी केला आहे. या भूकंपामुळे मोठी जीवितहानी होण्याची शक्यता वर्तवली जात आहे.

यूएसजीएसनुसार, भूंकपाचे मुख्य केंद्र उत्तर अफगाणिस्तानातील मजार ए शरीफ शहरापासून सुमारे २८ किलोमीटर अंतरावर होते. भूकंपाचे धक्के इतके तीव्र होते की, ते आजूबाजूच्या जिल्ह्यांमध्ये आणि शेजारील देशांमध्ये जाणवले. भूकंपाचे अनेक व्हिडिओ समाजमाध्यमांमध्ये व्हायरल झाले होते. या व्हिडिओत अफगाणिस्तानमधील भयावह परिस्थिती स्पष्टपणे दिसत आहे.

कोसळेल्या इमारती, ढिगाऱ्यात अडकलेली लोक, मदतकार्यात गुंतलेले स्थानिक लोक यात दिसून येत आहे. स्थानिक अधिकाऱ्यांनी सांगितले की, ढिगाऱ्यात अडकलेल्यांना वाचवण्यासाठी बचाव पथके अथक परिश्रम घेत आहेत. अनेक भागांत संपर्क तुटला होता. मदत कार्यातही अडथळा निर्माण झाला होता, अशी माहिती त्यांनी दिली.

यापूर्वी २३ सप्टेंबर रोजी दक्षिण पूर्व अफगाणिस्तानमध्ये ४.९ तीव्र रिश्टर स्केल भूकंप आला होता. तर, ३१ ऑगस्टमध्येही देशाच्या पूर्व भागातील काही ठिकाणी भूकंपाचे हादरे जाणवले होते. ज्यामध्ये २,२००हून अधिक लोक मृत्यूमुखी पडले होते. वारंवार येणाऱ्या भूकंपाच्या धक्क्यांमुळे अफगाणिस्तानमधील काही भाग हादरला आहे.