Politics : आगामी निवडणुकीपूर्वी बाहुबली नेत्याला जोरदार झटका, मुलाने स्थापन केला वेगळा पक्ष

Politics News : बिहारचे माजी मुख्यमंत्री लालू प्रसाद यादव यांना मोठा धक्का बसला आहे. लालू याचे मोठे पुत्र तेज प्रताप यादव यांनी त्यांच्या नव्या पक्षाची घोषणा केली आहे. तेज प्रताप यांच्या नवीन पक्षाचे नाव जनशक्ती जनता दल असे आहे. निवडणूक आयोगाने पक्षाच्या निवडणूक चिन्हाचे वाटप देखील केले आहे. तेज प्रताप यांच्या पक्षाला ब्लॅक बोर्ड हे चिन्ह देण्यात आले आहे. पक्षाच्या पोस्टरमधून तेज प्रताप यांचे वडील लालू यादव यांना वगळण्यात आले आहे.

तेज प्रताप यादव यांच्या जनशक्ती जनता दल या नवीन पक्षाच्या पोस्टमध्ये महात्मा गांधी, बाबासाहेब आंबेडकर, डॉ. राम मनोहर लोहिया, लोकनायक जयप्रकाश नारायण आणि बिहारचे माजी मुख्यमंत्री कर्पूरी ठाकूर यांचा समावेश करण्यात आला आहे. तेज प्रताप यांनी राजद पक्ष सोडल्यानंतर वडील लालू प्रसाद यादव आणि आई राबडी देवी यांच्याबद्दल वारंवार आदर व्यक्त केला असला, तरी पोस्टरवर त्या दोघांचे नाव वगळले आहे.

काही महिन्यापूर्वी लालू प्रसाद यादव यांच्या घरातील आणि पक्षातील वाद समोर आला होता. लालू यांचे पुत्र तेज प्रताप यादव यांचे अनुष्का यादव यांच्यासोबतचे काही फोटो सोशल मीडियावर व्हायरल झाले. त्यानंतर लालू प्रसाद यांनी तेज प्रताप यांच्यावर कारवाई केली. त्यांनी तेज यांना राजद पक्षातून काढून टाकले होते.

आगामी बिहार विधानसभा निवडणुकीपूर्वी, तेज प्रताप यादव यांनी एका नवीन पक्षाद्वारे त्यांची राजकीय कारकीर्द पुढे नेण्याचा निर्णय घेतला आहे. काही महिन्यांपूर्वी, तेज प्रताप यांना त्यांचे वडील लालू प्रसाद यादव यांनी राष्ट्रीय जनता दल म्हणजेच राजद पक्षातून सहा वर्षांसाठी काढून टाकले होते. त्यामुळे तेज प्रताप यांनी नवीन पक्ष स्थापन केला.