Congress Leader Death : काँग्रेसच्या नेत्याची दिवसाढवळ्या हत्या, दुचाकीवरुन आलेल्या हल्लेखोरांनी झाडल्या गोळ्या

Congress : राजधानी दिल्लीमध्ये एक धक्कादायक घटना घडली. दिल्लीतील बेगमपूर भागात काँग्रेस नेते लखपत सिंह कटारिया यांच्यावर दिवसाढवळ्या जीवघेणा हल्ला झाला. दुचाकीवरून आलेल्या दोन हल्लेखोरांनी कटारिया यांच्यावर गोळ्या झाडल्या. आसपासच्या लोकांनी त्यांना जवळच्या रुग्णालयात दाखल केले. तेथे उपचारादरम्यान त्यांचा मृत्यू झाला.

मिळालेल्या माहितीनुसार, शुक्रवारी (२६ सप्टेंबर) लखपत सिंह कटारिया हे मॉर्निंग वॉकसाठी घराच्या बाहेर पडले होते. वॉकदरम्यान दुचाकीवरून आलेल्या दोघांनी त्यांच्यावर गोळीबार केला. या घटनेची माहिती मिळताच पोलिसांचे पथक घटनास्थळी दाखल झाले. दोन अज्ञातांच्या विरोधात पोलिसांनी गुन्हा दाखल केला आहे. पोलीस घटनास्थळावरील सीसीटीव्ही फुटेज तपासत आहेत.

दिल्ली पोलीस दलातील एका अधिकाऱ्याने घटनेची माहिती दिली. मालवीय नगर पोलीस ठाण्यात सकाळी ९.५३ वाजता पीसीआर कॉल आला. दुचाकीवरुन येणाऱ्या दोघांनी कोणावर तरी गोळीबार केला आहे, असे फोन करणाऱ्या व्यक्तीने सांगितले. विजय मंडल पार्कजवळ दुचाकीवरुन आलेल्या दोघांनी लखपत सिंह कटारिया यांना थांबवले आणि त्यांच्यावर गोळीबार केला. गोळ्या झाडल्यानंतर ते दोघे घटनास्थळावरुन पळून गेले, अशी माहिती त्या अधिकाऱ्याने दिली.

लखपत सिंह कटारिया (वय ५५ वर्षे) हे दिल्लीतील बेगमपूर भागात राहतात. ते प्रॉपर्टी डीलर आहेत, याशिवाय ते राजकारणामध्येही सक्रीय आहेत. लखपत कटारिया हे काँग्रेस समितीचे सदस्य होते. मॉर्निंग वॉकला जाताना सकाळी त्यांच्यावर गोळ्या झाडण्यात आल्या. या जीवघेण्या हल्ल्यामुळे गंभीररित्या जखमी झालेल्या कटारिया यांचा मृत्यू झाला आहे.