Heart Attack: जिममध्ये व्यायाम करताना पोलीस अधिकाऱ्याला हृदयविकाराचा झटका; १० सेकंदातच झाला मृत्यू

Police Officer Heart Attack VIDEO

जिममध्ये व्यायाम करत असताना एका पोलीस अधिकाऱ्याचा हृदयविकाराचा झटक्याने मृत्यू झाल्याची धक्कादायक घटना उघडकीस आली आहे. जोगिंदर देशवाल असं मृत पोलीस अधिकाऱ्याचं नाव असून ते हरियाणा पोलीस दलात डेप्युटी जेलर म्हणून कार्यरत होते. गेल्या पाच महिन्यांपासून ते नियमित जिमला जात होते. (Latest Marathi News)

रविवारी सकाळी जोगिंदर देशवाल नेहमीप्रमाणे जिमला गेले. तिथे काही काळ कसरत केल्यानंतर त्यांना अचानक घाम आला. काही कळण्याच्या आतच ते खाली कोसळले. ही बाब जिम ट्रेनरच्या लक्षात येताच त्यांनी तातडीने देशवाल यांना उपचारासाठी रुग्णालयात दाखल केले.

मात्र, उपचारापूर्वीच देशवाल यांचा मृत्यू झाला होता. दरम्यान, थरकाप उडवणारी ही घटना जिममधील सीसीटीव्ही कॅमेऱ्यात (Heart Attack) कैद झाली आहे. जोगिंदर देशवाल यांचं अचानक निधन झाल्याने देशवाल कुटुंबियांवर दु:खाचा डोंगर कोसळला असून पानिपत पोलीस प्रशासनात शोककूल वातावरण आहे.

कोरोना काळापासून देशात हृदयविकाराच्या रुग्णांमध्ये सातत्याने वाढ होत आहे. रस्त्यावरुन चालताना तसेच व्यायाम करताना हृदयविकाराच्या झटक्याने अनेक तरुणांचा मृत्यू झाल्याच्या घटना समोर येत आहे. बॉलीवूड आणि दक्षिणेतील प्रसिद्ध कलाकारांना जिममध्ये व्यायाम करताना हृदयविकाराच्या झटक्याने मृत्यू झाला आहे.

अगदी तीन-चार दिवसांपूर्वी गुजरातमध्ये नवरात्रीच्या गरबा उत्सवादरम्यान हृदयविकाराच्या झटक्याने १० जणांचा मृत्यू झाल्याची घटना माहिती समोर आली होती. मृतांमध्ये किशोरवयीन मुलांसह मध्यमवयीन लोकांचा समावेश होता. यामध्ये सर्वात लहान मुलगा १३ वर्षांचा असून तो बडोदा येथील रहिवासी होता.