Crime: आईने पोटच्या २ मुलींना संपवलं, एकीची उशीने तर दुसरीची ओढणीच्या सहाय्याने हत्या; नंतर..., दिल्ली हादरली

Summary -

• दिल्लीतील मालवीय नगरमध्ये भयंकर हत्याकांड

• आईने पोटच्या दोन मुलींची हत्या केली

• मुलींना संपवल्यानंतर आईचा आत्महत्येचा प्रयत्न

• एका मुलीचा उशीने तर दुसऱ्या मुलीचा ओढणीने गळा आवळून हत्या

नवी दिल्लीच्या मालवीय नगरमध्ये हत्याकांडाची भयंकर घटना घडली. एका महिलेने आपल्या दोन मुलींची हत्या केली. त्यानंतर या महिलेने आत्महत्या करण्याचा प्रयत्न केला. पोलिसांनी घटनास्थळी धाव घेत महिलेचे प्राण वाचवले. पण या महिलेची प्रकृती गंभीर असून तिच्यावर रुग्णालयात उपचार सुरू आहेत. महिलेचे वय अंदाजे ५५ ते ६० दरम्यान असावे. तर तिने हत्या केलेल्या दोन्ही मुलींचे वय अनुक्रमे २८ आणि ३४ वर्षे असावे. या घटनेमुळे दिल्ली हादरली आहे. पोलिसांनी या प्रकरणी गुन्हा दाखल करत ते महिलेचा जबाब नोंदवण्यासाठी तिच्या शुद्धीवर येण्याची वाट पाहत आहेत.

दिल्ली पोलिस सध्या महिलेच्या नातेवाईकांची देखील चौकशी करत आहेत. पोलिसांनी सांगितले की, ही घटना मालवीय नगरमध्ये घडली. पोलिसांना संध्याकाळी ६ वाजताच्या सुमारास कॉल आला होता. महिलेच्या नवऱ्याने पोलिसांना फोन करून घटनेची माहिती दिली होती. त्याने पोलिसांना सांगितले होते की, घराचा दरवाजा उघड नाही आणि आतमधून कुणाचाच आवाज येत नाही.

पोलिसांनी घटनास्थळी धाव घेतली आणि दरवाजा तोडला तर आतमधील दृश्य खूपच भयावह होते. घरामध्ये एका मुलीचा मृतदेह सापडला तिच्या चेहऱ्यावर उशी होती. तर दुसऱ्या मुलीच्या गळ्याभोवती ओढणी होती. या दोन्ही सख्ख्या बहिणींची हत्या करण्यात आली होती.

पोलिसांनी घराच्या आतमधील खोलीमध्ये जाऊन पाहणी केली तर आतमध्ये एक महिला बेशुद्धावस्थेत पडली होती. त्या महिलेला तात्काळ रुग्णालयात दाखल करण्यात आले. या महिलेची प्रकृती गंभीर असून तिच्यावर रुग्णालयात उपचार सुरू आहेत. प्राथमिक तपासातून असे समोर आले की, महिलेने दोन्ही मुलींची हत्या करून नंतर आत्महत्येचा प्रयत्न केला.

पोलिसांनी दोन्ही मुलींचे मृतदेह शवविच्छेदनासाठी रुग्णालयामध्ये पाठवले. क्राईम आमि फॉरेन्सिक टीमच्या मदतीने पुरावे गोळा केले जात आहेत. पोलिस आसपास राहणाऱ्या नागरिकांची चौकशी करत आहेत. पोलिस महिलेच्या शुद्धीवर येण्याची वाट पाहत आहेत. महिलेने मुलींची हत्या का केली? यामागचे कारण अद्याप समोर आले नाही.