Mexico News: आनंदाचं वातावरण क्षणात दु:खात बदललं; धार्मिक कार्यक्रमात अंधाधुंद गोळीबार, १२ जणांचा मृत्यू

रस्त्यावरील हिंसाचाराचा भयानक इतिहास असलेल्या मेक्सिकोमध्ये धक्कादायक घटना घडली आहे. मेक्सिकोमधील नागरिक संद्याकाळच्या सुमारास आनंदोत्सव साजरा करत असताना अंदाधुंद झालेल्या गोळीबारात १२ जणांचा मृत्यू झाला आहे. ही घटना मेक्सिकोमधील ग्वानाजुवाटो भागात घडली आहे.

गेल्या महिन्यातील ग्वानाजुआटोमधील सॅन बार्टोलो डी बेरिओस येथे कॅथोलिक चर्चने आयोजित केलेल्या पार्टीला लक्ष्य करून केलेल्या गोळीबारात सात जणांचा मृत्यू झाला होता. ही घटना ताजी असताना, मेक्सिकोमधील हिंसाचारग्रस्त मानल्या जाणाऱ्या ग्वानाजुवाटोच्या इरापुआटो शहरात स्थानिक लोक सेंट जॉन द बॅप्टिस्ट यांच्या जयंतीच्या निमित्ताने नाचत होते तसेच मद्यपान करत होते. आनंदाने रंगलेल्या या संद्याकाळी गोळीबार झाल्याने स्थानिक नागरिकांच्या आनंदावर विरजण पडलं. सोशल मीडियावर ऑनलाईन व्हायरल झालेल्या व्हिडिओनुसार लोक घाबरून सैरावैरा पळत असल्याचे चित्र दिसत आहे.

या व्हिडिओमध्ये तरुण मंडळी रस्त्यावर बेधूंद नाचत आहेत. सगळीकडे मज्जा मस्तीचे वातावरण असताना अचानक गोळीबार सुरु झाला. गोळीबाराच्या आवाजाने व्हिडिओमधील तरुण मंडळी इकडे तिकडे धावताना दिसत आहे. यानंतर तिथे गोंधळ वाढल्याचं दृश्य निर्माण झालं.

इरापुआटोचे अधिकारी रोडोल्फो गोमेझ सर्व्हेंटेस यांनी बुधवारी पत्रकार परिषदेत सांगितले की, बळींची संख्या १२ वर पोहोचली आहे.तर या घटनेत सुमारे २० जण जखमी झाले आहेत. मेक्सिकोच्या राष्ट्राअध्यक्ष क्लॉडिया शेनबॉम यांनी या हल्ल्याचा निषेध केला आहे. त्याचबरोबर घडलेल्या दुर्घटनेची लवकरात लवकर चौकशी करण्याचे आदेश दिले आहेत.

गुन्हेगारी गटातील सुरु असलेल्या युद्धांमुळे मेक्सिको हिंसक राज्यांपैकी एक बनले आहे. या राज्यात वर्षाच्या पहिल्या पाच महिन्यांत १४३५ इतकी खून संख्या नोंदवली गेली आहे. हा आकडा कोणत्याही राज्याच्या हिंसक संख्येच्या दुप्पट आहे.