Mexico Plan Crashes: मेक्सिकोमध्ये मोठी दुर्घटना; नागरिकांची गर्दी असलेल्या कार्यक्रमात विमान कोसळलं, पायलटचा जागीच मृत्यू

Mexico News:

मेक्सिकोमधून एक मोठी बातमी समोर आली आहे. शहरात एका समारंभादरम्यान फुले उधळणाऱ्या विमानाचा भीषण अपघात झाला आहे. या अपघातात एकाचा मृत्यूही झालाय. (Latest Marathi News)

मेक्सिकोमध्ये जेंडर रिव्हील हा कार्यक्रम सुरू होता. कार्यक्रम सुरु असताना होणाऱ्या बाळाचे आई बाबा फार आनंदी होते. त्यांच्या आनंदात सहभागी होत शुभेच्छा देण्यासाठी भरपूर पाहुणे देखील येथे उपस्थित होते. मुलगी होणार की मुलगा हे जाहीर केल्यावर समारंभात पती पत्नीवर फुलांचा वर्षाव करण्यात आला. यावेळी एका विमानातून देखील त्यांच्यावर गुलाल आणि फुले उधळण्यात आली. या विमानाचा भीषण अपघात झाला आहे.

गुलाल आणि फुले उधळून विमान पुढे गेल्यावर काही तांत्रिक बिघाड या विमानात झाला. त्यामुळे विमान खाली कोसळलं. या अपघातात पायलटचा जागीच मृत्यू झाला आहे. घटना घडली तेव्हा पायलटला तातडीने रुग्णालयात नेण्यात आले. मात्र डॉक्टरांनी त्यांना मृत घोषित केलं.

सदर घटनेमुळे उपस्थितांमध्ये एकच गोंधळ उडाला होता. आनंदाच्या कार्यक्रमात दु:खद घटना घडल्याने कुटुंबातील व्यक्ती आणि नातेवाईक हळहळ व्यक्त करत आहेत. या घटनेचा व्हिडीओ देखील सोशल मीडियावर व्हायरल झाला आहे. व्हिडीओ व्हायरल झाल्यानंतर नेटकऱ्यांनी यावर दु:ख व्यक्त केलंय.