Jaipur Fire: फटाक्यांच्या गोदामाला भीषण आग; ७ जणांचा होरपळून मृत्यू

राजस्थानमधील जयपूर येथील खोह- नागोरियन परिसरात असलेल्या एका फटाक्याच्या फॅक्ट्रीला भीषण आग लागली आहे. या दुर्घटनेत ७ जणांचा होरपळून मृत्यू झाला आहे. एसएमएस मेडिकल कॉलेजचे मुख्याध्यापक आणि रुग्णालयाचे अधिकारी डॉ. दीपक माहेश्वरी यांनी फटाक्याच्या फॅक्ट्रीला आग लागल्याची माहिती दिली.

मिळालेल्या वृत्तानुसार, मंगळवारी सकाळी जयपूरच्या खोह नागोरियन भागातील एका कथित बेकायदेशीर फटाक्यांच्या गोदामात स्फोट झाला त्यानंतर भीषण आग लागली. खोह नागोरियनच्या आयेशा नगर तलाई कॉलनीतील एका लहान घरात ही आग लागली, जिथे कथितरित्या फटाके साठवून ठेवले होते.

मुख्यमंत्र्यांकडून शोक व्यक्त

राजस्थानचे मुख्यमंत्री भजनलाल शर्मा यांनी या दुर्घटनेबदद्ल दुःख व्यक्त केले. इंस्टाग्रामवरील एका पोस्टमध्ये मुख्यमंत्री भजनलाल शर्मा म्हणाले, "जयपूरच्या खोह नागोरियन परिसरात झालेल्या अपघातातील जीवितहानीची बातमी दुःखद आणि दुर्दैवी आहे." जिल्हा प्रशासनाच्या संबंधित अधिकाऱ्यांना बचाव कार्य आणि जखमींना तात्काळ रुग्णालयात दाखल करण्याचे निर्देश दिले आहेत. मृतांच्या आत्माला शांती मिळो, तसेच दु: खाचा डोंगर कोसळलेल्या कुटुंबियांप्रती सांत्वन करतो,देव त्यांना दु:खातून सावरण्याची शक्ती देवो अशी प्रार्थना करतो.

आग का लागली याची चौकशी केली जाणार

जयपूरचे जिल्हाधिकारी संदेश नायक यांनी सांगितले की, प्राथमिक माहितीनुसार, परिसरात ठेवलेल्या ज्वलनशील पदार्थांमुळे आग लागली असावी. "घरात काही ज्वलनशील पदार्थ होते, परंतु आगीचे नेमके कारण काय आहे हे सविस्तर तपासानंतरच कळेल."

ते घर निवासी भागात होते त्याचा बेकायदेशीरपणे गोदाम म्हणून वापर केला जात होता. त्या गोदामाजवळच एक उत्पादन युनिट होते. "प्राथमिक दृष्ट्या, ही एक साठवणुकीची जागा असल्याचे दिसते. फॉरेन्सिक चाचणीतून गोदामात साठवलेला माल फटाके होता की नाही, हे निश्चित होईल." मालक आणि जबाबदार असलेल्या कोणावरही कारवाई केली जाईल, अशी माहिती जयपूरचे पोलीस आयुक्त सचिन मित्तल यांनी दिली आहे. "

प्रत्यक्षदर्शींनी सांगितली आपबीती

एका स्थानिक व्यक्तीने दिलेल्या माहितीनुसार, त्यांनी आधी एका स्फोटाचा आवाज ऐकला. स्फोटाचा आवाज आल्यानंतर त्यांनी गोदामाकडे धाव घेतली. स्थानिकांनी गोदामातील कामगारांना वाचवण्याचा प्रयत्न केला. आग लागल्यानंतर पाण्याचा टँकरला पाचारण करण्यात आले. त्यांनी एका पाईपच्या साहाय्याने आगीवर पाणी टाकलं. नंतर आत जाण्याचा प्रयत्न केला. स्थानिकांनी तीन-चार लोकांना बाहेर काढलं. नंतर रुग्णालयात नेण्यात आले. गोदामाच्या शेजारी राहणाऱ्या लियाकत नावाच्या दुसऱ्या रहिवाशाने सांगितले की, संपूर्ण गोदामाला आगीच्या भक्ष्यस्थानी टाकण्यापूर्वी त्याला सिलेंडरच्या स्फोटासारखा मोठा आवाज ऐकू आला होता.