UAEमध्ये मोठा ड्रोन हल्ला, अणुऊर्जा प्रकल्प प्लांटमध्ये आगीचा भडका

संयुक्त अरब अमिराती (UAE) मधील अल-अफ्रा प्रदेशातील बरका अणुऊर्जा प्रकल्पावर ड्रोन हल्ला झाला आहे. या हल्ल्यानंतर एका वीज जनरेटरला आग लागली आहे. अबू धाबी मीडिया ऑफिसने जारी केलेल्या निवेदनानुसार, अधिकाऱ्यांनी सांगितले की या घटनेत कोणीही जखमी झाले नाही आणि किरणोत्सर्गी सुरक्षिततेच्या पातळीवर कोणताही परिणाम झाला नाहीये.

युएईने निवेदनात काय माहिती दिली?

अबु धाबी मीडिया ऑफिसने रविवारी (१७ मे, २०२६) 'एक्स' या सोशल मीडिया प्लॅटफॉर्मवर एक पोस्ट शेअर केली. त्या पोस्टमध्ये म्हटले आहे की, "अल-धाफ्रा भागातील बरका अणुऊर्जा प्रकल्पाच्या बाहेर असलेल्या पॉवर जनरेटरला आग लागली आहे. अबु धाबी प्रशासनाने तात्काळ प्रतिसाद दिला आहे."

ड्रोन हल्ल्यामुळे आग लागली. यात कोणीही जखमी झाले नाही. किरणोत्सर्गी सुरक्षिततेच्या पातळीवर कोणताही परिणाम झाला नाहीये. अधिकाऱ्यांनी सांगितले की, सर्व खबरदारीचे उपाय योजण्यात आले असून, नवीन माहिती उपलब्ध होताच पुढील माहिती दिली जाईल.

संघीय अणुऊर्जा नियामक प्राधिकरणाने (FANR) पुष्टी केली आहे की, आगीमुळे वीज प्रकल्पाच्या सुरक्षिततेवर किंवा त्याच्या महत्त्वाच्या प्रणालींच्या कार्यक्षमतेवर कोणताही परिणाम झालेला नाही. वीज प्रकल्पातील सर्व युनिट्स सामान्यपणे कार्यरत आहेत. जनतेला आवाहन करण्यात येत आहे की, त्यांनी केवळ अधिकृत स्रोतांकडूनच माहिती घ्यावी आणि अफवा किंवा अपुऱ्या माहितीचा प्रसार करणे टाळावे.

ड्रोन हल्ल्यासाठी कोण जबाबदार?

या ड्रोन हल्ल्यासाठी नेमके कोण जबाबदार आहे, हे निवेदनात स्पष्ट करण्यात आले नाही. इराणसोबत सुरू असलेल्या अमेरिका-इस्रायल संघर्षादरम्यान, संयुक्त अरब अमिरातीवर अलीकडे अनेक क्षेपणास्त्र आणि ड्रोन हल्ले झाले आहेत. ज्यामध्ये अधिकाऱ्यांनी काही घटनांसाठी इराणला जबाबदार धरले आणि सांगितले की या हल्ल्यांचे लक्ष्य ऊर्जा केंद्रे आणि सागरी पायाभूत सुविधा होत्या.