Shocking : ...अन् १ वर्षांच्या मुलाच्या घशात अडकला जिवंत मासा; पालकांची एकच धावाधाव, नेमकं काय घडलं?

मध्य प्रदेशातील इंदूर येथे एक वर्षाच्या मुलाच्या तोंडामध्ये जिवंत मासा अडकल्याची घटना घडली आहे. या घटनेने डॉक्टर देखील गोंधळात सापडले. दरम्यान त्या मुलावर यशस्वी शत्रक्रिया करण्यात आली असून त्याच्या तोंडातून जिवंत मासा बाहेर काढण्यात डॉक्टरांना यश आले आहे. या घटनेनंतर पुन्हा एकदा पालकांचं आपल्या मुलांकडे दुर्लक्ष होत आहे का? असा सवाल उपस्थित केला जात आहे.

मिळालेल्या माहितीनुसार, सदर घटना मध्य प्रदेशातील इंदूर येथे घडली आहे. एका घरात फिश टँक साफ करण्याचं काम सुरु होतं. याच दरम्यान त्या घरातील एक वर्षाचं बाळ बाजूला खेळत होत. खेळता खेळता त्या बाळाने फिश टँक वरती हात मारून चॉकलेट खावं तसं एक मासा पटकनं तोंडात टाकला. हा जिवंत मासा बाळाच्या घशात अडकल्याने त्याला श्वास घेण्यास त्रास होऊ लागला.

इतकेच नाही तर मुलाच्या नाकातून आणि तोंडातून रक्तस्त्राव होत होता. त्याची प्रकृती गंभीर झाल्याने कुटुंबीयांनी त्याला तातडीने रुग्णलयात हलवले. डॉक्टरांनी त्याच्यावर उपचार सुरु केले. अथक प्रयत्न करून डॉक्टरांनी सुमारे ३ इंच लांबीचा मासा यशस्वीपणे बाहेर काढला. माशाच्या कल्ल्यांच्या आणि पंखांच्या हालचालीमुळे मुलाच्या घशाला आणि अन्ननलिकेला इजा झाली असल्याचं डॉक्टरांनी म्हटलं.

हॉस्पिटलचे अधीक्षक डॉ. अशोक यादव यांनी सांगितले की, एंडोस्कोपीच्या साहाय्याने शस्त्रक्रिया यशस्वीरित्या पार पडली. तज्ज्ञांच्या मते, लहान मुलांमध्ये अशा घटना खूप धोकादायक ठरू शकतात, कारण त्यांचे श्वसनमार्ग अरुंद असतात आणि त्यात थोडासा अडथळा आला तरी तो जीवघेणा ठरू शकतो. त्यामुळे, पालकांनी आपल्या मुलांना लहान किंवा इतर वस्तूंपासून दूर ठेवावे आणि त्यांच्यावर बारकाईने लक्ष ठेवावे असे आवाहन करण्यात आले आहे.