MP Accident: भीषण अपघात! भरधाव जीपची दुचाकीला धडक; अनियंत्रित कार घरात घुसली, ५ जणांचा जागीच मृत्यू

मध्य प्रदेशातील अनूपपूर येथे जीप आणि दुचाकीचा भीषण अपघात घडला आहे. या अपघातात ५ जणांचा मृत्यू झाला असून तीन जण गंभीर जखमी झालेत. भरधाव वेगात असलेली एक जीप एका दुचाकीला धडकली. या अपघातात पाच जणांचा जागीच मृत्यू झालाय. तर जखमींना एका सार्वजनिक रुग्णालयात दाखल करण्यात आले आहे.

घटनेबाबत मिळालेल्या अधिका माहितीनुसार, काही लोक जरिया टोला येथून बेलिया छोटकडे प्रवास करत होते. जीप भरधाव वेगात होती. त्याचवेळी समोरुन येणाऱ्या दुचाकीला जीपची धडक झाली.धडकनंतर जीप अनियंत्रित होऊन जवळच्याच एका घरावर जाऊन धडकली. या धडकेत जीपमधील ३ जणांच जागीच मृत्यू झाला.

तर जीपच्या धडकेत दोन दुचाकी स्वारांचा जागीच मृत्यू झालाय. या अपघातात तीन जण गंभीर जखमी झाले असून त्यांना एका सार्वजनिक रुग्णालयात दाखल करण्यात आले आहे. या अपघाताची माहिती मिळताच पोलीस घटनास्थळी दाखल झाले. यानंतर त्यांनी मृतदेह ताब्यात घेऊन शवविच्छेदनासाठी पाठवले.

अपघातात मोटारसायकल चालक अमृत चौधरी आणि त्याच्या मागे बसलेला व्यक्ती जागीच मृत पावलेत. रामनगर पोलीस स्टेशन परिसरात हा अपघात झाला. बेलिया छोटकडे स्कॉर्पिओ गाडीतून सात जण जात होते. त्यावेळी समोरून येणाऱ्या मोटारसायकलची जीपशी धडक झाली. प्रत्यक्षदर्शींनी दिलेल्या माहितीनुसार, स्कॉर्पिओ चालकाने घटनास्थळावरून पळून जाण्याचा प्रयत्न केला पण त्याचे वाहनावरील नियंत्रण सुटले.

त्यामुळे जीप रस्त्याच्या बाजुला असलेल्या घरात शिरली. यात स्कॉर्पिओमधील तीन प्रवाशांचाही मृत्यू झाला. शुभम अहिरवार, राहुल केवट आणि सौरभ प्रधान अशी हे कारमधील मृत पावलेल्या प्रवाशांची नावे आहे. तर इतर तीन जखमी झाले असून त्यांना कोटमा सामुदायिक आरोग्य केंद्रात दाखल करण्यात आले आहे. गंभीर जखमींना जिल्हा रुग्णालयात हलवण्याची शक्यता आहे. घटनेनंतर लगेचच पोलीस घटनास्थळी पोहोचले आणि तपास सुरू केला आहे.