IMD Warns : आभाळ फाटल्यासारखा पाऊस, जिकडे-तिकडे पाणीच पाणी, कंरट लागल्यामुळे ७ जणांचा मृत्यू

Kolkata heavy rain electrocution deaths September : कोलकात्यामध्ये सध्या आभाळ फाटल्यासारखा पाऊस सुरू आहे. शहरातील अनेक भागात जिकडे तिकडे पाणीच पाणी साचले आहे. पावसामुळे अनेक घरातही पाणी साचलेय. अस्मानी संकटात कोलकात्यामधील एक दुर्दैवी घटना घडली आहे. पाण्यात विजेचा करंट लागून वेगवेगळ्या ठिकाणी सात जणांचा मृत्यू झाला आहे. पावसाच्या पाण्यात विजेची तार पडली अन् करंट लागून जीव गमावल्याची भयानक घटना घडली. या घटनेनंतर कोलकात्यामध्ये हळहळ व्यक्त करण्यात येत आहे. पश्चिम बंगालच्या मुख्यमंत्री ममता बॅनर्जी यांनी या घटनेबाबत दुख व्यक्त केलेय.

पश्चिम बंगालची राजधानी कोलकात्यामध्ये दोन ते तीन दिवसांपासून अतिवृष्टी झाली. दुर्गा पूजेच्या आधी कोलकात्यामध्ये आस्मानी संकटाने हाहाकार माजवला. पावसामुळे अनेक रस्त्यांवर पाणी साचलेय, त्यामुळे वाहतूक ठप्प झाली आहे. त्याशिवाय मेट्रो, लोकल अन् ट्रेनसेवाही विस्कळीत झाली आहे. हवाई वाहतूकही काही काळासाठी ठप्प झाली आहे. अति मुसळधार पावसामुळे कोलकात्यामधील जनजीवन विस्कळीत झाले आहे. हवामान विभागाने पुढील काही दिवस मुसळधार पावसाचा अंदाज वर्तवला आहे. दक्षिण बंगालमधील काही जिल्ह्यांमध्ये मुसळधार ते अति मुसळधार पावसाची शक्यता वर्तवली आहे.

कोलकाता मनपाने दिलेल्या माहितीनुसार, शहराच्या दक्षिण आणि पूर्व भागात पुढील काही तास तीव्र पावसाची शक्यता आहे. गरियामध्ये काही तासांत ३३२ मिली मीटर पाऊस कोसळलाय. जोधपुर पार्कमध्ये 285 मिमी, कालीघाट 280 मिमी, तोपसिया 275 मिमी, बल्लीगंज 264 मिमी आणि थंटानियामध्ये 195 मिमी पावसाची नोंद झाली. पावसामुळे कोलकात्यामध्ये काही ठिकाणी विजेच्या तारा तुटण्याच्या घटना घडल्या आहेत. कोलकाता शहरात विजेचा करंट लागून आतापर्यंत सात जणांचा मृत्यू झाल्याचे वृत्त आहे.

बुधवारीही पावसाचा हाहाकार -

मागील २४ तासात कोलकात्यामध्ये पावसाने हाहाकार माजवला आहे. मुसळधार पावसामुळे कोलकात्यामध्ये रस्त्यावर पाणीच पाणी झाले आहे. हवामान विभागाच्या अंदाजानुसार, पुढील २४ तास कोलकात्यामध्ये मुसळधार पाऊस पडण्याची शक्यता आहे. बुधवारी दक्षिण बंगालमध्ये मेदिनीपूर, दक्षिण 24 परगना, झारग्राम आणि बांकुडा या जिल्ह्यात अति मुसळधार पावसाची शक्यता आहे. इतर ठिकाणी तुरळक पावसाचा अंदाज वर्तवला आहे.