Kupwara Terror Attack : जम्मू-काश्मीरमध्ये पुन्हा एकदा चकमक; सैन्य दलाचा १ जवान शहीद, एका दहशतवाद्याचाही खात्मा

जम्मू-काश्मीर :

जम्मू काश्मीरच्या कुपवाडामध्ये पुन्हा एकदा दहशतवादी आणि सुरक्षा दलामध्ये चकमक झाली. कुपवाडा भागात अनेक दहशतवादी लपल्याची माहिती मिळत आहे. सुरक्षा दलाच्या जवानांनी एका दहशतवाद्याचाही खात्मा केला आहे. तर या चकमकीत ४ जवान जखमी झाले आहेत. तर १ जवान शहीद झाला आहे.

जम्मू-काश्मीरच्या कुपवाडामधील चकमकीनंतर एकच खळबळ उडाली आहे. या चकमकीनंतर सैन्य दलाने म्हटलं की, 'उत्तर काश्मीरच्या कुपवाडामध्ये माछिल भागात गोळीबार झाला. या चकमकीत एक दहशतवादी मारला गेला. तर घटनास्थळावरील जवानही जखमी झाले आहेत'.

सुरक्षा दलाला कुपवाडामध्ये दहशतवादी लपल्याची माहिती मिळाली होती. यामुळे मागील दिवसानंतर सैन्य दलाकडून दहशतवाद्यांच्या विरोधात ऑपरेशन सुरु होतं. दहशतवाद्यांकडून BAT हल्ला सुरु होता. BAT हल्ला म्हणजे बॉर्डर अॅक्शन टीम. या टीममध्ये पाकिस्तानी सेनेचे कमांडो आणि दहशतवादी सामील असतात. या टीममधील दहशतवादी एलओसीवर घुसखोरीचा प्रयत्न करतात.

BAT म्हणजे काय?

BAT टीममध्ये पाकिस्तानी सैन्य दलाचे नियमित जवान सामील असतात. त्यात SSG कमांडो देखील सामील असतात. ते दहशतवादी संघटनांची मदत घेऊन काम करतात. एका रिपोर्टनुसार, या टीममध्ये ५०-५५ दहशतवादी हे २-३ दहशतवाद्यांच्या तुकड्यांमध्ये काम करतात. या दहशतवाद्यांना स्थानिक पातळीवरही पाठिंबा मिळतो.

सूत्रांनी दिलेल्या माहितीनुसार, सैन्य दल आणि अन्य सुरक्षा यंत्रणा घुसखोरांना रोखण्यासाठी प्लान आखण्यास सुरुवात केली आहे. आंतराष्ट्रीय सीमेवर घुसखोरांना रोखण्यासाठी तपासणी देखील सुरु करण्यात आली आहे. तसेच दहशतवादी कारवाया रोखण्यासाठी सैन्य दलाची विशेष पथकावर स्पेशल ट्रेनिंग देण्यात येणार असल्याची माहिती मिळत आहे.