Washim Dog Attack: पिसाळलेल्या कुत्र्याचा हैदोस! ८ जणांचे लचके तोडले; तीन चिमुकल्यांसह महिला गंभीर जखमी

मनोज जैस्वाल, वाशिम|ता. २२ जुलै २०२४

वाशिम जिल्ह्यातील रिसोड शहरामध्ये पिसाळलेल्या कुत्र्याने हैदोस घातला असून आठ जणांवर हल्ला केल्याची धक्कादायक घटना समोर आली आहे. यामध्ये तीन चिमुकल्यांसह एक महिला गंभीर जखमी झाली असून सर्वांना उपचारासाठी रुग्णालयात दाखल करण्यात आले आहे.

याबाबत सविस्तर माहिती अशी की, वाशिम जिल्ह्यातील रिसोड शहरामध्ये एका पिसाळलेल्या कुत्र्याने हैदोस घातल्याचे समोर आले आहे. कुत्र्याने शहरातील विविध भागांमध्ये आठ जणांवर हल्ला करत गंभीर जखमी केले. जखमींमध्ये तीन लहान मुलांचा समावेश असून एक ७० वर्षीय वृद्ध महिला गंभीर जखमी झाली आहे.

या सर्वांवर प्राथमिक उपचार केल्यानंतर सर्व रुग्णांना दोन ॲम्बुलन्सने वाशिम येथे पुढील उपचाराकरिता पाठविले आहे. या कुत्र्याने रिसोड शहरातील महात्मा फुले नगर,अहबाब नगर, अमरदास नगर, मूल्लागल्ली येथील नागरिकांना चावा घेतला.

दरम्यान, पिसाळलेल्या कुत्र्याने अनेकांवर हल्ला करुन जखमी केल्यानंतर स्थानिक नागरिकांनी कुत्र्याला जीवे मारले. या घटनेने परिसरात खळबळ उडाली आहे. नागरिकांमध्ये भितीचे वातावरण पसरले आहे.