इराणमध्ये कोरोनाचा विस्फोट; दर दोन मिनिटाला एक मृत्यू

इराणमध्ये (Iran) संसर्गाच्या पाचव्या (Coronavirus Fifth Wave) आणि सर्वात मोठ्या लाटेने देशभरात कहर केला आहे. देशात लसीच्या तीव्र कमतरतेमुळे कोरोनाचा प्रादुर्भाव झपाट्याने वाढला आहे. इराणमधील सर्व रुग्णालये भरलेली आहेत यावरून याचा अंदाज लावला जाऊ शकतो. परिस्थिती एवढी भिषण आहे की रूग्णांना रुग्णालयाच्या मजल्यावर आणि पार्किंगवर उपचार करावे लागत आहे. खाटांच्या कमतरतेमुळे नातेवाईक रुग्णालयाबाहेर खाजगी वाहने उभी करून रुग्णांवर उपचार घेत आहेत. देशात ऑक्सिजनच्या तीव्र कमतरतेमुळे परिस्थिती अधिक गुंतागुंतीची झाली आहे.

देशात एक आठवडा लॉकडाऊन

इराणमध्ये कोरोनाची वाढती प्रकरणे पाहता देशात आठवडाभर लॉकडाऊन लागू करण्यात आला आहे. इराणमध्ये एका दिवसात सापडलेल्या नवीन रुग्णांची संख्या 40 हजारांच्या पुढे गेली आहे. एका दिवसात विक्रमी 600 मृत्यू होत आहेत. एका अहवालात दावा करण्यात आला आहे की 8.30 कोटी लोकसंख्या असलेल्या इराणमध्ये कोरोनामुळे दर दोन मिनिटांनी एक मृत्यू होत आहे. डॉक्टर, परिचारिका आणि इतर वैद्यकीय कर्मचारी आतापर्यंतच्या सर्वात वाईट टप्प्यातून जात आहेत.

आतापर्यंत इराणमध्ये 43.90 लाखांहून अधिक रुग्णांची नोंद

इराणच्या आरोग्य मंत्रालयाच्या मते, कोरोनाच्या डेल्टा प्रकारामुळे रुग्णांमध्ये झपाट्याने वाढ झाली आहे. आतापर्यंत इराणमध्ये 43.90 लाखांहून अधिक रुग्णांची नोंद झाली आहे. 97,200 हून अधिक कोरोना रुग्णांचा मृत्यू झाला आहे. गेल्या एक आठवड्यापासून दररोज 39 हजार ते 40,800 नवीन रुग्ण आढळले आहेत, तर 37 लाखांहून अधिक रुग्ण बरे झाले आहेत. तेहरानच्या विषाणू टास्क फोर्सचे उपप्रमुख नादिर तवाकोली म्हणाले की, कोरोनाची पाचवी लाट किती नासधूस करेल याचा आम्ही अंदाज लावू शकत नाही.

Edited By: Pravin Dhamale