Army Cheetah Helicopter Crash: मोठी बातमी! लडाखमध्ये लष्कराचे हेलिकॉप्टर क्रॅश; डोंगराला धडकलं चीता हेलिकॉप्टर

लडाखमधील एका डोंगरला भारतीय लष्कराचे हेलिकॉप्टर धडकल्यानंतर खाली कोसळले आहे. सूत्रांनी दिलेल्या माहितीनुसार हे हेलिकॉप्टर श्योक नदीजवळच्या एका डोंगराला धडकलं . सुदैवाची गोष्ट म्हणजे हेलिकॉप्टरमधील लष्कराचे डिव्हिजन कमांडर (मेजर जनरल दर्जाचे अधिकारी) सुरक्षित आहेत. पण दोन्ही वैमानिक जखमी झालेत.

हा अपघात २० मे रोजी दिवसा घडला होता, घटनेची माहिती मिळताच, लष्कराने तात्काळ कारवाई करत १५ ते २० मिनिटांच्या आत घटनास्थळी आपत्कालीन मदत आणि बचाव पथके पाठवली. तीन लष्करी अधिकाऱ्यांना हेलिकॉप्टरच्या ढिगाऱ्यातून सुखरूप बाहेर काढत रुग्णालयात दाखल केलं. त्यांच्यावर लेह येथील रुग्णालयात उपचार सुरू आहेत.

लष्करी सूत्रांनी दिलेल्या माहितीनुसार, अपघाताच्या वेळी लडाखमधील हवामान पूर्णपणे स्वच्छ होते. कमी दृश्यमानता किंवा खराब हवामानासारख्या कोणत्याही समस्या नव्हत्या. त्यामुळे हेलिकॉप्टर डोंगराला कसे धडकले? असा सवाल उपस्थित होतोय, याबद्दल तर्कवितर्क काढले जात आहेत. अपघाताचे खरे कारण निश्चित करण्यासाठी लष्कराने अधिकृतपणे चौकशी समिती नेमण्याचे आदेश दिले आहेत.

लष्काराचं चीता हेलिकॉप्टर पुन्हा चर्चेत

दरम्यान लष्कराचा जुना 'चीता' ताफा पुन्हा एकदा चर्चेत आला आहे. या अपघातामुळे लष्कराच्या जुन्या हेलिकॉप्टर ताफ्याबद्दल पुन्हा एकदा चिंता व्यक्त केली जातेय. चीता हे एक-इंजिन असलेले हेलिकॉप्टर आहे, जे भारतीय लष्कराकडून बऱ्याच काळापासून दुर्गम आणि उंच भागांमध्ये वापरले जात आहे.

आकडेवारीनुसार, लष्करी हवाई दलाकडे सध्या अंदाजे १९० चीता, चेतक आणि चीतल हेलिकॉप्टर आहेत. चिंताजनक बाब म्हणजे, यापैकी पाच हेलिकॉप्टर ५० वर्षांपेक्षा जुनी आहेत, तर अंदाजे १३० हेलिकॉप्टर ३० ते ५० वर्षे वयोगटातील आहेत. यामुळे संरक्षण तज्ज्ञ बऱ्याच काळापासून ही हेलिकॉप्टर बदलण्याची मागणी करत आहेत.