हायप्रोफाईल सोसायटीत खळबळजनक घटना! दिग्गज IAS अधिकाऱ्याचा संशयास्पद अंत, पोलिसांना सापडलं पत्र

दिल्लीचे माजी मुख्य सचिव आणि १९७५ च्या बॅचचे आयएएस (IAS) अधिकारी राकेश मेहता (वय ७४) यांचे नोएडा येथील राहत्या घरात निधन झाले. नोएडामधील सेक्टर-८२ येथील केंद्रीय विहार-२ सोसायटीतील एका बंद फ्लॅटमध्ये त्यांचा मृतदेह आढळून आला. या घटनेमुळे प्रशासकीय वर्तुळात प्रचंड खळबळ उडाली आहे. घटनास्थळावरून पोलिसांना एक सुसाइड नोट सापडली आहे. त्यांनी आजारपण आणि मानसिक तणावातून हे टोकाचे पाऊल उचलल्याचा प्राथमिक अंदाज व्यक्त केला जात आहे.

मिळालेल्या माहितीनुसार, राकेश मेहता हे गेल्या काही वर्षांपासून नोएडामधील या फ्लॅटमध्ये एकटेच राहत होते. त्यांची पत्नी (माजी आयएएस अधिकारी) आणि मुलगा देहराडून येथे राहतात. शनिवारी रात्री राकेश मेहता यांचे त्यांच्या पत्नीशी फोनवर बोलणे झाले होते. पण रविवारी दुपारी कौटुंबिक नातेवाईकांनी आणि पत्नीने वारंवार फोन करूनही त्यांनी कोणताही प्रतिसाद दिला नाही.

संशय आल्याने पत्नीने सोसायटीच्या सुरक्षा रक्षकांना फ्लॅटवर जाऊन पाहण्यास सांगितले. सुरक्षारक्षक जेव्हा फ्लॅटवर पोहोचले, तेव्हा दरवाजा आतून बंद होता. त्यांनी खिडकीतून डोकावून पाहिले असता हा धक्कादायक प्रकार समोर आला. यानंतर पोलिसांना 'डायल-११२' वरून माहिती देण्यात आली.

घटनास्थळी पोहोचलेल्या पोलीस आणि फॉरेन्सिक टीमने पाहणी केली. पोलिसांना तेथे इंग्रजीत लिहिलेली एक पानाची चिठ्ठी (सुसाइड नोट) सापडली आहे. या चिठ्ठीत त्यांनी आपल्या या निर्णयासाठी कोणालाही जबाबदार धरलेले नाही. दीर्घकाळापासून असलेले आजारपण आणि मानसिक तणावाला कंटाळून आपण हे पाऊल उचलत असल्याचे त्यांनी नमूद केले आहे.

प्रशासकीय सेवेतील योगदान

राकेश मेहता हे दिल्ली प्रशासनातील अत्यंत प्रभावी आणि अभ्यासू अधिकारी मानले जात होते. त्यांनी तत्कालीन मुख्यमंत्री शीला दीक्षित यांच्या कार्यकाळात २००७ ते २०१० या कालावधीत दिल्लीचे मुख्य सचिव म्हणून जबाबदारी सांभाळली होती. २०१० च्या दिल्ली कॉमनवेल्थ गेम्सच्या यशस्वी आयोजनात त्यांची मुख्य प्रशासक म्हणून अत्यंत महत्त्वाची भूमिका होती. दिल्लीतील वाहतूक सुधारणा, लो-फ्लोर बस सेवा सुरू करणे, वीज क्षेत्राचे खाजगीकरण आणि दिल्ली महापालिकेचे (MCD) आयुक्त म्हणूनही त्यांनी अनेक मोठे सुधारणात्मक निर्णय घेतले होते.