Hyderabad Tragedy: अग्नितांडव! फर्निचरच्या गोदामाला भीषण आग, 5 कामगारांचा होरपळून मृत्यू

हैदराबादमधील नामपल्ली येथील एका फर्निचरच्या गोदामाला शनिवारीच्या संध्याकाळी भीषण आग लागली होती. या दुर्घटनेत ५ कामगारांचा होरपळून मृत्यू झालाय. पाचही जणांचे मृतदेह बाहेर काढण्यात आले आहेत. गोदामाच्या मालकाविरुद्ध गुन्हा दाखल करण्यात आला आहे. याबाबतची माहिती अग्निशमन विभागाचे महासंचालक विक्रम सिंह मान यांनी दिली.

नामपल्ली स्टेशन रोडवरील फर्निचरच्या गोदामामध्ये प्लायवूड, रेगझिम, फोम, केमिकल सोल्युशन यासह इतर गोष्टी असल्याने आगीने भडका घेतला. ही आग एवढी भीषण होती की आत अडकलेल्या कामगारांना बाहेरही पडता आलं नाही. फर्निचर दुकानाला आग लागल्याची माहिती अग्निशमन दलाला मिळताच अग्निशमन दलाने घटनास्थळी धाव घेतली. लागलीच बचावकार्य सुरू केलं.

रात्रभर चाललेल्या मोहिमेदरम्यान एका व्यक्तीला सुखरूप वाचवण्यात आलं. मात्र पाच कामगारांचा यात मृत्यू झालाय. आम्हाला पाच जण गोदामात अडकल्याची माहिती मिळाल्यानंतर अग्निशमन दलाच्या जवानांनी शोधकार्य सुरू केलं. सकाळी ९ वाजून १५ मिनिटांच्या सुमारास पहिला मृतदेह सापडला. त्यानंतर एकामागोमाग पाचही मृतदेहही बाहेर काढण्यात आले. सर्व मृतदेह शवविच्छेदनासाठी उस्मानीया रुग्णालयात पाठवण्यात आले आहेत, अशी माहिती अग्निशमन दलाचे महासंचालक मान यांनी दिली.

इमारतीच्या तळघरात त्यांच्या राहण्याची सोय करून देण्यात आली होती. तळघर फक्त वाहनांच्या पार्किंगसाठी होते. मात्र तिथे कामगारांसाठी राहण्याची व्यवस्था करण्यात आली होती. गोदामाला आग लागल्याने कामगारांनी तळघरातून बाहेर पडण्याचा प्रयत्न केला. धूर आणि आगीच्या भडक्यामुळे त्यांना बाहेर पडता आले नाही. एकमेकांना वाचवण्याच्या नादात पाच कामगारांचा मृत्यू झाला.

तळघरामध्ये मोठ्या प्रमाणात ज्वलनशील पदार्थ साठवून ठेवण्यात आलेले होते. त्यामुळे आग विझवण्यात आणि मृतदेह बाहेर काढण्यास बराच वेळ लागला. अग्निशमन दलाने शर्थीचे प्रयत्न करत आग विझवली आणि मृतदेह बाहेर काढले.