Hyderabad Crime News: ऑफिसमध्ये सर्वांसमोर अंगावर पेट्रोल ओतून लावली आग; पत्नीने केला पतीच्या आत्महत्येचा धक्कादायक खुलासा

Hyderabad News:

हैदराबादमधून काळजाचा थरकाप उडवणारी बातमी समोर आली आहे. एका व्यक्तीने आपल्या ऑफिसमधील कर्मचाऱ्यांसमोर आत्महत्या केली आहे. त्याने स्वत:च्या अंगावर पेट्रोल ओतून आत्मदहन केलं आहे. या घटनेमुळे परिसरात एकच खळबळ उडाली. या व्यक्तीचा पगार गेल्या काही महिन्यांपासून देण्यात आला नव्हता त्या रागातून त्याने आत्महत्या केल्याची माहिती मिळाली आहे. (Latest Marathi News)

घटनेबाबत मिळालेल्या अधिक माहितीनुसार, रविंद्र असे आत्महत्या केलेल्या व्यक्तीचे नाव आहे. ३६ वर्षीय रविंद्र ट्रॅफिक पोलिस स्टेशनला काम करत होता. पगार न मिळाल्याने त्याने अंगावर पेट्रोल ओतलं आणि स्वत:ला जाळून घेतलं. ही घटना घडली त्यावेळी उपस्थितांमध्ये एकच घबराट निर्माण झाली. काहींनी पुढे येत रविंद्रला आगीच्या कचाट्यातून बाहेर खेचलं.

तसेच त्याला तातडीने रुग्णालात दाखल करण्यात आलं. डॉक्टरांनी त्याला वाचवण्यासाठी शर्थिचे प्रयत्न केले. मात्र उपचारादरम्यान त्याचा मृत्यू झाला. मंगळवारी ही घटना घडली आहे. रविंद्र त्या दिवशी गोशामहल पोलिस स्टेडियमजवळ असलेल्या कमांडंट होमगार्डच्या कार्यालयात पगार मिळण्याची वाट पाहत होता.

रविंद्रची पत्नी संध्याने या घटनेनंतर सहाय्यक उपनिरीक्षक आणि कमांडंट ऑफिसमधील कॉन्स्टेबलवर आरोप केलेत. पगार वेळेत न दिल्याने आणि चुकीची वागणूक दिल्याने माझ्या पतीने आत्महत्येचं पाउल उचललं असं पत्नीने म्हटलंय.