हृदयद्रावक! दशक्रियाविधी वेळी मुंडन करताना गंगा नदीत ६ जण बुडाले, ४ जणांचा मृत्यू

उत्तर प्रदेशातील बलिया जिल्ह्यातून एक हृदयद्रावक बातमी समोर आली. दशक्रियाविधी वेळी मुंडन करताना ६ जण गंगा नदीत बुडाल्याची घटना घडली आहे. या भीषण दुर्घटनेत चार जणांचा पाण्यात बुडून मृत्यू झाला, तर दोघांना वाचवण्यात आले आहे. मुख्यमंत्री योगी आदित्यनाथ यांनी या घटनेची दखल घेतली आहे. घटनेची माहिती मिळाल्यानंतर मुख्यमंत्र्यांनी प्रशासनाला तातडीने मदत आणि बचाव कार्य सुरू करण्याचे निर्देश दिले.

मिळालेल्या माहितीनुसार, ही दुखद घटना फेफाना पोलीस ठाण्याच्या हद्दीतील कल्याणीपूर येथे घडली. येथील रहिवासी वशिष्ठ चौहान यांचे कुटुंबीय दशक्रिया विधी करण्यासाठी गंगा नदीच्या किनारी गेले होते. त्यावेळी मुंडन करताना ही घटना घडली. चौहान यांचे संपूर्ण कुटुंब आणि नातेवाईक बलिया शहरातील कोतवाली परिसरातील शिवरामपूर घाट येथे दशक्रियेसाठी जमले होते.

धार्मिक विधींदरम्यान लोक गंगा नदीत स्नान करत होते त्यावेळी चार मुली अचानक खोल पाण्यात गेल्या आणि बुडू लागल्या. जवळच असलेले दोन तरुण त्यांना वाचवण्यासाठी नदीत उतरले, पण पाण्याच्या जोरदार प्रवाहामुळे तेही पाण्यात बुडून मरण पावले.

एका तरुणीला आणि एका तरुणाला वाचवण्यात यश

घाटावरील लोकांनी तात्काळ प्रतिसाद देत एका तरुणीला आणि एका तरुणाला वाचवले. परंतु इतर चार जण बेपत्ता होते. माहिती मिळताच, स्थानिक पोलीस आणि पाणबुड्यांचे एक पथक घटनास्थळी दाखल झाले. अथक प्रयत्नांनंतर एनडीआरएफ (NDRF) येण्यापूर्वी स्थानिक डायव्हर्सनी नदीतून चार मृतदेह बाहेर काढले.

गडवार पोलीस ठाण्याच्या हद्दीतील रामपूर भोज येथील रहिवासी हर्षिता (१७) आणि नंदिता (१२) अशी पटली आहे. या अपघातात महेशपूरचे रहिवासी असलेले अर्जुन चौहान (१९) आणि गाझीपूर जिल्ह्यातील खेळाडू अरुण चौहान (२०) अशी मृतांची ओळख पटली आहे.

या दुर्घटनेची माहिती मिळताच बलियाचे जिल्हाधिकारी (डीएम) आणि पोलीस अधीक्षक (एसपी) परिस्थितीचा आढावा घेण्यासाठी घटनास्थळी दाखल झाले. मुख्यमंत्री योगी आदित्यनाथ यांनी पीडितांना सर्वतोपरी मदत करण्याचे आणि जखमींवर मोफत व योग्य उपचार देण्याचे स्पष्ट निर्देश अधिकाऱ्यांना दिले आहेत. हाती आलेल्या माहितीनुसार, पोलिसांनी मृतदेह ताब्यात घेऊन शवविच्छेदनासाठी पाठवले आहेत. या अपघातामुळे नदीकिनारी असलेल्या सुरक्षा व्यवस्थेबद्दल पुन्हा एकदा प्रश्न उपस्थित झालेत.