Haryana University: सर, ब्रेक हवा; पीरियड्स आलेल्या महिलेला काढायला लावले कपडे, विद्यापीठातील धक्कादायक प्रकार

हरियाणातील रोहतक येथील महर्षी दयानंद विद्यापीठात (MDU) मंगळवारी महिला स्वच्छता कर्मचारी आणि अधिकाऱ्यांमध्ये मोठा वाद झाला. मासिक पाळीमुळे त्रास होत असल्यानं एका महिला सफाई कर्मचारीने आपल्या पर्यवेक्षकांकडे ब्रेक मागितला. मात्र त्यावेळी पर्यवेक्षकानं ब्रेक देण्यास नकार दिला. महिलेला खरंच मासिक पाळी आली आहे का हे तपासण्याचे आदेश दिले. त्यामुळे सफाई कर्मचारी आणि पर्यवेक्षकांमध्ये वाद झाला.

वाद वाढल्यानंतर विद्यार्थी संघटनांनीही स्वच्छता कर्मचाऱ्यांना पाठिंबा दिला. तसेच आरोपींना निलंबित करण्याची मागणी केली. हा वाद वाढल्यानंतर विद्यापीठ प्रशासनावर दबाव वाढला त्यानंतर विद्यापीठ प्रशासनाने पर्यवेक्षकाला घाईघाईने कर्तव्यावरून काढून टाकले.

कपडे काढून फोटो पाठवा

हरियाणा विद्यापीठातील महिला सफाई कर्मचाऱ्याला मासिक पाळी आल्यानं तिने पर्यवेक्षकाकडे ब्रेक मागितला. मासिक पाळीमुळे त्रास होत असल्यानं महिलेनं ब्रेक मागितला. मात्र पर्यवेक्षकाने सुट्टी देण्याऐवजी महिलेसोबत गैरवर्तन केलं. महिलेची समस्या जाणून घेण्याऐवजी असभ्य वर्तन केलं. पर्यवेक्षकाने एक दुसऱ्या सफाई कर्मचाऱ्याला संबंधित महिलेला खरंच मासिक पाळी आली आहे का हे तपासायला लावले.

इतकेच नाही तर महिलेचे कपडे उतरवून त्याचे फोटो पाठवा असं पर्यवेक्षकाने सांगितलं. त्यावर महिला कर्मचारी संतापली आणि तिने असं काही करण्यास नकार दिला. तेव्हा पर्यवेक्षकाने तिच्यासोबत जबरदस्ती करण्याचा प्रयत्न केला, असा आरोप दोन सफाई कर्मचाऱ्यांनी केलाय. दरम्यान पर्यवेक्षकाचे असे वर्तन पाहून महिलांनी आरडाओरड करत पर्यवेक्षकासोबत वाद घातला.

वाद वाढल्यानंतर कुलगुरू केके गुप्ता घटनास्थळी पोहोचले. याप्रकरणी बोलताना विद्यापीठाचे कुलगुरू म्हणाले की, ते याप्रकरणी कठोर कारवाई करतील. संपूर्ण घटनेची चौकशी केली जाईल, यात विद्यापीठात महिलांसोबत झालेल्या कोणत्याही गैरवर्तनाची चौकशी केली जाईल असं कुलसचिव म्हणालेत.

सध्या पर्यवेक्षकाला नोकरीवरून काढून टाकण्यात आले आहे. जर गरज असली तर एससी आणि एसटी अंतर्गत तक्रार दाखल केली जाईल. कोणत्याच महिला कर्मचाऱ्याशी गैरवर्तन सहन केलं जाणार नाही, असं कुलगुरू म्हणालेत.