Haryana Assembly Election : विनेश फोगट विरुद्ध WWE रेसलर मैदानात; आपची चौथी यादी जाहीर, जाणून घ्या कोणाला कुठून मिळाली संधी

Haryana Assembly Election 2024, Aam Aadmi Party 4th Candidate List:

हरियाणा विधानसभा निवडणुकीत स्वबळावर निवडणुकीच्या रिंगणात उतरणाऱ्या आम आदमी पक्षाने आपल्या उमेदवारांची चौथी यादी जाहीर केली आहे. या यादीत आम आदमी पक्षाने एकूण 21 उमेदवारांच्या नावाची घोषणा केली आहे. आपने आतापर्यंत हरियाणा विधानसभा निवडणुकीसाठी 61 उमेदवार जाहीर केले आहेत.

आपल्या चौथी यादीत आपने काँग्रेस आणि भाजपविरुद्ध मजबूत उमेदवार दिले आहेत. आपने हरियाणाचे मुख्यमंत्री नायबसिंग सैनी यांच्याविरोधात लाडवा मतदारसंघातून जोगा सिंह यांना उमेदवारी दिली आहे. या जागेवरून काँग्रेसने मेवा सिंह यांना तिकीट दिलं आहे. तर विनेश फोगट या जुलानामधून निवडणूक लढवत आहे. आम आदमी पक्षाचे त्यांच्याविरोधात WWE रेसलर कविता दलाल यांना रिंगणात उतरवलं आहे. तसेच आपने निशांत आनंद यांना गुरुग्राममधून उमेदवारी दिली आहे.

कोणाला कुठून देण्यात आलं तिकीट?

आम आदमी पक्षाने अंबाला कँटमधून राज कौर गिल, यमुनानगरमधून ललित त्यागी, कैथलमधून सतबीर सिंग, कर्नालमधून सुनील बिंदल, पानिपत ग्रामीणमधून सुखबीर मलिक, गणौरमधून सरोज बाला राठी, सोनीपतमधून देवेंद्र सिंग, गोहानामधून शिवकुमार रंगीला, आणि शिवकुमार रंगीला यांना उमेदवारी दिली आहे. बडोद्यामधून संदीप मलिक, सफिदोमधून निशा देशवाल, तोहानामधून सुखविंदर सिंग गिल, कालानवलीतून जसदेव निक्का, सिरसामधून शाम मेहता यांना उमेदवारी दिली आहे.

तसेच आम आदमी पक्षाच्या इतर उमेदवारांमध्ये उकलानामधून नरेंद्र उकलाना, नारनौडमधून राजीव पाली, हांसीमधून राजेंद्र सोरखी, हिसारमधून संजय सत्रोदिया आणि बदलीमधून हॅपी लोचाब यांना उमेदवारी दिली आहे.

दरम्यान, आम आदमी पक्ष हरियाणा विधानसभा निवडणूक काँग्रेससोबत आघाडी करून लढण्याचा प्रयत्न करत होते.. यासाठी दोन्ही पक्षांमध्ये चर्चेच्या अनेक फेऱ्या झाल्या. दोन्ही पक्षांच्या नेत्यांनी युतीची घोषणा करण्यासाठी 12 सप्टेंबरची तारीख दिली होती. मात्र दुसऱ्याच दिवशी आप पक्षाने एकट्याने निवडणूक लढवण्याची घोषणा केली.