धक्कादायक! आधी कबर खणायला लावली; नंतर गोळ्या झाडून पुरला तिचाच मृतदेह

ब्राझील- आधी तरुणीला तिची कबर खणायला लावली आणि त्यानतंर तिची हत्या करण्यात आल्याची धक्कदायक घटना घडली आहे. हा धक्कादायक प्रकार ब्राझीलमध्ये घडला आहे. मित्राच्या वाढदिवसाच्या पार्टीसाठी आलेल्या तरुणीला अंमली पदार्थ तस्करांनी धमकावून खड्डा खणायला लावला. त्यानंतर गोळी झाडून तिची हत्या करण्यात आली आहे. ही घटना ब्राझीलमधील सँटा कटरिना राज्यात घडली आहे. 21 वर्षीय अमांडा अल्बाच असे मृत तरुणीचे नाव आहे.

हे देखील पहा -

स्थानिक पोलिसांच्या माहितीनुसार वाढदिवसाच्या पार्टीत काही गुंड प्रवृत्तीचे तरुण आले होते. हे सर्व संशयित एखाद्या मोठ्या ड्रग रॅकेटचे सदस्य असल्याची माहिती समोर आली आहे. \अमांडा अल्बाचने गुपचूप काही संशयितांचे फोटो कॅमेऱ्यात कैद केले. एका संशयिताची नजर तिच्यावर पडली आणि त्यावर त्याने फोटो काढण्यास आक्षेप घेतला. त्यावेळी या संशयितांनी अमांडा अल्बाचला मारण्याचा कट रचला.

त्यानंतर पार्टी होऊन बराच काळ होऊन देखील अमांडा घरी परतली नव्हती. तिच्या कुटुंबीयांनी मोबाईलवर संपर्क साधला असता नंबर बंद होता. त्यामुळे कुटुंबीयांनी पोलिसांशी संपर्क साधला. पोलिसांच्या तपासात एक संशयित अंमली पदार्थ विक्रेता त्यांच्या हाती लागला आणि त्याने अमांडा अल्बाचची हत्या केल्याची कबुली दिली.

अटक करण्यात आलेल्या आरोपीने संपूर्ण हकीकत पोलिसांना सांगितली. अमांडाची हत्या करण्यापूर्वी मारेकऱ्यांनी तिला जबरदस्तीने धमकावून तिला कबर खोदायला लावली होती अशी माहिती पोलिसांनी दिली. कबर खोदल्यानंतर संशयितांनी तिला गोळ्या घातल्या. त्यानंतर तिचा मृतदेह त्याच कबरीमध्ये पुरला.

Edited By - Shivani Tichkule