निवडणूक आयोगाने शिवसेनेचं धनुष्यबाण चिन्ह गोठवलं; साम टीव्हीला सूत्रांची माहिती

शिवाजी काळे

Shivsena News : शिवसेना कुणाची? शिवसेनेचे धनुष्यबाण कोणाला मिळणार? की शिवसेनेचं चिन्ह गोठावणार? या प्रश्नाकडे साऱ्यांचे लक्ष लागलं होतं.. शिवसेनेने (Shivsena) धनुष्यबाणासाठी केंद्रीय निवडणूक आयोगाकडे महत्वाची कागदपत्र सादर केली. याच पार्श्वभूमीवर केंद्रीय निवडणूक आयोगाची बैठक पार पडली. या बैठकीनंतर निवडणूक आयोगाने शिवसेनेचं धनुष्यबाण चिन्ह गोठावल्याची माहिती साम टीव्हीला सूत्रांनी दिली आहे.

शिंदे गटाने बंडखोरी केल्यानंतर त्यांनी शिवसेना पक्ष आणि धनुष्यबाण चिन्हावर केला होता. त्यामुळे शिवसेनेच्या दोन्ही गटाचा वाद कोर्टात पोहोचला होता. त्यानंतर हा वाद केंद्रीय निवडणूक आयोगाकडे पोहोचला. याचदरम्यान, अंधेरी पोटनिवडणूक काही दिवसांवर ठेपल्याने केंद्रीय निवडणूक आयोगाने बैठक घेऊन महत्वाचा निर्णय घ्यावा लागणार होता.

आज, शनिवारी केंद्रीय निवडणूक आयोगाची धनुष्यबाणाबाबत महत्वाची बैठक झाली. केंद्रीय निवडणूक आयोगाची सुमारे चार तास बैठक चालली. या बैठकीनंतर केंद्रीय निवडणूक आयोगाने शिवसेनेचे धनुष्यबाण चिन्ह गोठवलं अशी माहिती सूत्रांनी दिली आहे. केंद्रीय निवडणूक आयोगाच्या या निर्णयानंतर शिवसेनेच्या ठाकरे गटाला मोठा धक्का बसला आहे.

केंद्रीय निवडणूक आयोगाच्या निर्णयानंतर दोन्ही गटाला उपलब्ध १९७ पैकी एका चिन्हाची निवड करावी लागणार आहे. यामध्ये ठाकरे गटाला हवं असलेलं ढाल, तलवार किंवा वाघ अशा प्रकराचे कोणतंही चिन्ह सदर यादीत नाही. त्यामुळे दोन्ही गट कोणत्या चिन्हाची निवड करतात हे पाहणं महत्वाचं आहे.

दरम्यान, केंद्रीय निवडणूक आयोगाच्या निर्णयानंतर ठाकरे गटाच्या वकीलांची बैठक सुरू झाली आहे. शिवसेनेच्या उद्धव ठाकरे (Uddhav Thackeray) गटानं पर्यायी चिन्ह देण्याच्या हालचाली सुरू केल्या आहेत. शिवसेनेकडून सोमवारी पर्यायी चिन्ह निवडणूक आयोगाकडे दिले जाईल.