महामार्गावर भीषण अपघात! पहाटे वाहन डिव्हायडरला धडकले; ५ जणांचा मृत्यू, १ गंभीर जखमी

शनिवारी सकाळी दिल्ली - जयपूर महामार्गावरील झाडसा चौकात भीषण अपघाताची घटना घडली आहे. भरधाव चारचाकी वाहन दुभाजकावर धडकले. या भीषण अपघातात ५ जणांचा मृत्यू झाला आहे. तर, १ जण गंभीर जखमी असल्याची माहिती आहे. जखमी व्यक्तीवर खासगी रूग्णालयात उपचार सुरू आहे. या भीषण अपघातानंतर परिसरात खळबळ उडाली आहे.

अपघात कसा घडला?

गुरूग्राम परिसरात शनिवार २७ डिसेंबर २०२५ रोजी सकाळच्या सुमारास भीषण अपघात घडला. दिल्ली - जयपूर महामार्गावरील झाडसा चौकात भरधाव चारचाकी वाहन येत होते. चारचाकीचे नियंत्रण सुटल्याने थेट दुभाजकाला धडकली. पोलिसांनी दिलेल्या माहितीनुसार, पहाटे साडेचारच्या सुमारास हा भीषण अपघात घडला. चालकाचे वाहनावरील नियंत्रण सुटले.

त्यामुळे वाहन थेट दुभाजकाला घडकली. नंतर अनेकवेळा उलटली. हा अपघात इतका भीषण होता की, कार पूर्णपणे उद्ध्वस्त झाली. मिळालेल्या माहितीनुसार, वाहन दिल्लीहून गुरूग्रामच्या दिशेनं जात होती. कारमध्ये एकूण सहा जण होते. ज्यात ३ तरूण आणि ३ तरूणींचा समावेश होता. या अपघात २ तरूण आणि २ तरूणींचा मृत्यू झाला.

तर, एका तरूणीचा रूग्णालयात उपचारादरम्यान मृत्यू झाला. तर, एका तरूणावर खासगी रूग्णालयात उपचार सुरू आहे. पोलिसांना या अपघाताची माहिती मिळताच त्यांनी घटनास्थळी धाव घेतली. तसेच मृतदेह ताब्यात घेत शवविच्छेदनासाठी रूग्णालयात पाठवले आहे. सध्या पोलीस मृतांची ओळख पटवण्याचा प्रयत्न करीत आहे. पुढील तपास सुरू आहे.