Arvind Kejriwal: अरविंद केजरीवाल यांना न्यायालयाचा आणखी एक धक्का; उपचार करण्याची याचिका फेटाळली

Delhi Rouse Avenue Court Rejects Arvind Kejriwal Treatment Plea:

मुख्यमंत्री अरविंद केजरीवाल यांना राऊस ॲव्हेन्यू कोर्टाने मोठा धक्का दिलाय. केजरीवाल दिल्ली दारू धोरणप्रकरणात तिहार तुरुंगात आहेत. केजरीवाल यांनी दिल्लीच्या राऊस एव्हेन्यू कोर्टात व्हिडीओ कॉन्फरन्सिंगद्वारे वैद्यकीय उपचार घेण्यासाठी याचिका दाखल केली होती. केजरीवाल यांची ही याचिका न्यायालयाने फेटाळलीय.

याचिकेत केजरीवाल यांनी तिहार तुरुंग अधिकाऱ्यांकडे त्यांच्या साखरेची पातळी आणि मधुमेहाबाबत व्हिडीओ कॉन्फरन्सिंगद्वारे दररोज १५ मिनिटांसाठी इन्सुलिन आणि वैद्यकीय सल्लामसलत करण्याची परवानगी मागितली होती. त्यांची याचिका कोर्टात फेटाळण्यात आली. मात्र, न्यायालयाने केजरीवाल यांच्यासाठी वैद्यकीय मंडळ तयार करण्याचे आदेश दिले आहेत. केजरीवाल १ एप्रिलपासून तिहारमध्ये असून त्यांच्या न्यायालयीन कोठडीवर २३ एप्रिल रोजी पुन्हा सुनावणी होणार आहे.

अरविंद केजरीवाल यांना टाइप-२मधुमेह आहे. त्याला २१ मार्च रोजी दारू घोटाळ्याप्रकरणी अटक करण्यात आली होती. १८ एप्रिल रोजी केजरीवाल यांचे वकील विवेक जैन यांनी ट्रायल कोर्टात केजरीवाल यांच्या डॉक्टरांकडून व्हिडिओ कॉन्फरन्सिंगद्वारे वैद्यकीय सल्ला घेण्याची मागणी करणारी याचिका दाखल केली होती, असा युक्तिवाद केला होता. केजरीवाल हे टाइप-२ मधुमेहाचे रुग्ण आहेत. त्यांच्या रक्तातील साखरेची पातळी सतत चढ-उतार होत असते.

जामिनावरील जनहित याचिका फेटाळली

कथित मद्य घोटाळा प्रकरणात अटकेत असलेले मुख्यमंत्री अरविंद केजरीवाल यांना असाधारण अंतरिम जामीन देण्याबाबतच्या याचिकेवर हायकोर्टात सुनावणी झाली. सुनावणीत हायकोर्टाने ही मागणी फेटाळून लावत याचिकाकर्त्यांना ७५ हजारांचा दंडही ठोठावला. मुख्यमंत्री अरविंद केजरीवाल यांना असाधारण अंतरिम जामीन देण्याबाबतची याचिका दिल्ली उच्च न्यायालयात दाखल करण्यात आली होती. या याचिकेवर आज सुनावणी पार पडली. या सुनावणीत न्यायालयाने अरविंद केजरीवाल यांना असाधारण जामीन देण्याची मागणी करणारी याचिका फेटाळली.