Delhi High Court : व्हिडिओ रेकॉर्डिंग हटवा! CM केजरीवाल यांच्या पत्नी सुनीता यांना दिल्ली हायकोर्टाचे आदेश

नवी दिल्ली :

मद्यधोरणातील कथित घोटाळा प्रकरणाशी संबंधित कोर्टातील सुनावणींचे व्हिडिओ रेकॉर्डिंग सोशल मीडियावरून हटवण्यात यावेत, असे आदेश दिल्ली हायकोर्टानं मुख्यमंत्री अरविंद केजरीवाल यांच्या पत्नी सुनीता यांना दिले आहेत.

२८ मार्च रोजी दिल्ली हायकोर्टात मद्यधोरण प्रकरणाशी संबंधित सुनावणी झाली होती. त्या सुनावणीची व्हिडिओ रेकॉर्डिंग करण्यात आली होती. ती सुनीता केजरीवाल यांनी आपल्या सोशल मीडिया अकाउंट्सवरून शेअर केली होती. ते व्हिडिओ हटवण्यात यावेत, असे निर्देश हायकोर्टाने शनिवारी सुनीता केजरीवाल यांना दिले.

आम आदमी पक्षाचे प्रमुख अरविंद केजरीवाल हे सुनावणीदरम्यान काहीतरी बोलताना या व्हिडिओत दिसत आहेत. न्यायाधीश नीना बन्सल आणि अमित शर्मा यांच्या खंडपीठानं उल्लंघनाचे आरोप करणाऱ्या याचिकेवर सुनीता केजरीवाल आणि सोशल मीडिया प्लॅटफॉर्म्ससह सहा जणांना नोटीस बजावली होती. त्याचवेळी या प्रकरणी पुढील सुनावणी ९ जुलै रोजी होईल, असे कोर्टाने सांगितले.

सुनीता केजरीवालांनी व्हिडिओ केला रिशेअर

अरविंद केजरीवाल यांना ईडीने अटक केल्यानंतर दुसऱ्यांदा न्यायालयात हजर करण्यात आले होते, त्यावेळी केजरीवाल हे विशेष न्यायाधीशांसमोर (पीसी अॅक्ट) आपली बाजू मांडत होते. त्याची ऑडिओ/ व्हिडिओ रेकॉर्डिंग सोशल मीडियावर व्हायरल झाली होती. सुनीता केजरीवाल यांनी एका अन्य अकाउंटवरून पोस्ट केलेले व्हिडिओ रिट्विट केले होते.