Shocking: धक्कादायक! मित्रच बनला वैरी; २५ वर्षीय युवकाची दगडाने ठेचून हत्या, नेमकं घडलं काय?

दिल्लीत रात्रीच्या सुमारास एक भयंकर घटना घडली. समयपूर बादली परिसरात रविवारी रात्री एका २५ वर्षीय तरुणाची दगडाने ठेचून निर्घृण हत्या करण्यात आली. या प्रकरणी पोलिसांनी दोन संशयितांना अटक केली. मात्र एक आरोपी अजूनही फरार आहे. पोलिसांच्या माहितीनुसार, मृताचे नाव मनीष कुमार असून अटक करण्यात आलेल्या आरोपींची नावे मनीष उर्फ बाबू आणि सुमित अशी आहेत. हे दोघे २२ आणि २३ वर्षांचे आहेत.

रविवारी रात्री सुमारे १० वाजताच्या सुमारास मनीष कुमार आणि त्याचा मित्र संतोष कुमार श्रीवास्तव समयपूर बादली परिसरात बाबूला भेटायला गेले होते. काही दिवसांपूर्वी बाबूने मनीषला जीवे मारण्याची धमकी दिली होती. सबवेजवळ झालेल्या एका भेटीत दोघांमध्ये वाद झाला आणि त्याचं पर्यावसन हाणामारीत झालं. बाबूसोबत त्याचा साथीदार सुमित आणि आणखी एक मित्रही सामील झाला.

या तिघांनी दगड घेऊन मनीष व संतोषवर हल्ला केला. मनीषच्या डोक्याला खूप दुखापती झाल्याने त्याचा जागीच मृत्यू झाला. संतोष गंभीर जखमी झाला आणि बेशुद्ध पडला. संतोषने शुद्धीवर आल्यानंतर पाहिले की मनीष रक्ताच्या थारोळ्यात पडलेला. त्याने ताबडतोब मदतीसाठी पोलिसांना माहिती दिली. मनीषला तातडीने रुग्णालयात नेण्यात आले परंतु डॉक्टरांनी त्याला मृत घोषित केले.

घटनेनंतर पोलिसांनी परिसरातील सीसीटीव्ही फुटेजची तपासणी केली. ज्यात तीन हल्लेखोर दिसून आले. अटक करण्यात आलेल्या दोघांनी गुन्ह्याची कबुली दिली असून तिसऱ्या आरोपीचा शोध सुरु आहे. पोलिसांनी घटनास्थळावरून एक स्कूटर, एक बाईकचा आणि हत्येत वापरलेले दगड जप्त केले आहेत.

तपासादरम्यान बाबू हा पूर्वी एका खून प्रकरणात सहभागी असल्याचे उघड झाले. त्याच्यावर इतर अनेक गुन्हे दाखल आहेत. बाबू आणि मनीष यांच्यातील वादाचे नेमके कारण काय होते, याचा तपास पोलीस करत आहेत. संतोष कुमार श्रीवास्तव याच्या तक्रारीवरून पोलिसांनी हत्येचा गुन्हा नोंदवला असून अटक केलेल्या दोघांना पोलिस कोठडीत ठेवण्यात आले आहे. तर तिसरा आरोपी फरार आहे आणि त्याचा शोध सुरू आहे.