Adhir Ranjan Chowdhary suspended : PM नरेंद्र मोदींची नीरव मोदीशी तुलना, अधीर रंजन चौधरी निलंबीत

Lok Sabha News : पंतप्रधान नरेंद्र मोदी यांची तुलना नीरव मोदींशी करणे काँग्रेस नेते अधीर रंजन चौधरी यांना महागात पडलं आहे. अधीर रंजन चौधरी यांना लोकसभेतून निलंबित करण्यात आले आहे. विशेषाधिकार समिती त्यांच्या विरोधात अहवाल सादर करेपर्यंत अधीर रंजन चौधरी यांना लोकसभेतून निलंबित करण्यात आले आहे.

मिळालेल्या माहितीनुसार, हे प्रकरण विशेषाधिकार समितीकडे प्रलंबित आहे. याप्रकरणी समिती चौकशी अहवाल सादर करणार आहे. तोपर्यंत अधीर रंजन चौधरी यांना सदनातून निलंबित करण्यात येणार आहे.

संसदीय कामकाज मंत्री प्रल्हाद जोशी यांनी म्हटलं की, अधीर रंजन चौधरी यांना माफी मागावी अशी मागणी आम्ही केली होती, मात्र त्यांनी माफी मागितली नाही. त्यांच्या विरोधात एक ठराव मांडण्यात आला जो मान्य करण्यात आला.

अधिर रंजन चौधरी काय म्हणाले?

नीरव मोदी हजारो कोटी रुपये लुटून देशातून पळून गेला. त्याला कोणी पकडू शकले नाही. आमच्या एनडीए सरकारमध्ये एवढी ताकद आहे, पण त्यांना हात लावू शकली नाही. नीरव मोदी कॅरेबियन समुद्रकिनारी मजा करताना दिसला होता.

मला वाटलं होतं की नीरव मोदी आयुष्यभर आपल्यापासून दूर गेलाय. पण मणिपूरची घटना पाहिल्यावर कळतंय की नीरव मोदी आपल्यापासून दूर गेला आहे. इथे भारतातच आहे. नरेंद्र मोदी अजूनही नीरव मोदी म्हणून शांत बसले आहेत. (Latest Marathi News)

आम्ही पंतप्रधानांना सभागृहात खेचून आणलं

अविश्वास ठरावाची ताकद बघा, आम्ही पंतप्रधान मोदींना सभागृहात खेचून आणलं आहे. संसदीय परंपरेचे ही ताकद आहे. मणिपूरवरील चर्चेत पंतप्रधान मोदींनी सहभागी व्हावे, अशी आमची इच्छा होती. पण त्यांनी सभागृहात न येण्याची शपथ का घेतली होती, माहीत नाही. अविश्वास प्रस्ताव आणण्याचा आम्ही यापूर्वी विचार केला नव्हता, परंतु आम्हाला आणावा लागला, असंही चौधरी यांनी म्हटलं.