Earthquake : अफगाणिस्तान भूकंपाने हादरलं! अनेकांची घरे उध्वस्त, २० जणांचा मृत्यू, १०० हून अधिक जखमी

पाकिस्तान सीमेजवळील आग्नेय अफगाणिस्तानात रविवारी रात्री उशिरा झालेल्या तीव्र भूकंपाने पुन्हा एकदा जनजीवन हादरवून सोडले आहे. अमेरिकन भूगर्भीय सर्वेक्षणानुसार, हा भूकंप स्थानिक वेळेनुसार रात्री ११:४७ वाजता झाला असून त्याची तीव्रता ६.० इतकी होती. भूकंपाचे केंद्र अफगाणिस्तानातील बासावूल शहरापासून सुमारे २२ मैल उत्तरेस होते आणि त्याची खोली अवघी ६.२ मैल असल्याने तो अत्यंत तीव्र स्वरूपाचा होता. यामुळे भूकंपाचा फटका मोठ्या प्रमाणावर बसला असून सध्या मिळालेल्या माहितीनुसार किमान २० जणांचा मृत्यू झाला आहे तर १०० हून अधिक लोक जखमी झाले आहेत.

नांगरहार सार्वजनिक आरोग्य विभागाचे प्रवक्ते नकीबुल्लाह रहीमी यांनी दिलेल्या माहितीनुसार, अनेक जखमींवर स्थानिक रुग्णालयांत उपचार सुरू आहेत. तालिबान सरकारच्या अधिकाऱ्यांनी दिलेल्या माहितीनुसार, या घटनेत अनेक घरे पूर्णपणे उद्ध्वस्त झाली आहेत आणि बरेच नागरिक अजूनही ढिगाऱ्याखाली अडकलेले असण्याची भीती व्यक्त केली जात आहे. त्यामुळे मृतांचा आकडा आणखी वाढण्याची शक्यता नाकारता येत नाही.

भूकंप झाल्यानंतर अवघ्या २० मिनिटांनी त्याच भागात आणखी एक धक्का बसला. त्याची तीव्रता ४.५ इतकी नोंदवली गेली असून तोदेखील उथळ स्वरूपाचा होता. या दुहेरी धक्क्यांमुळे नागरिकांमध्ये भीतीचं वातावरण निर्माण झालं आहे.

अफगाणिस्तान हा भूकंपप्रवण देश मानला जातो. गेल्या काही वर्षांत या देशाने भूकंपामुळे मोठा विध्वंस अनुभवला आहे. ऑक्टोबर २०२३ मध्ये ६.३ तीव्रतेच्या भूकंपाने देशाला हादरवले होते, ज्यामध्ये तालिबान सरकारने सुमारे ४,००० लोकांचा मृत्यू झाल्याचा अंदाज व्यक्त केला होता, तर संयुक्त राष्ट्रांच्या आकडेवारीनुसार १,५०० पेक्षा अधिक लोक मृत्युमुखी पडले होते. युनिसेफच्या अहवालानुसार, मृतांमध्ये ९० टक्क्यांहून अधिक महिला आणि मुलांचा समावेश होता. त्याआधी जून २०२२ मध्ये ५.९ तीव्रतेच्या भूकंपात १,००० पेक्षा अधिक लोक मृत्युमुखी पडले होते आणि १,५०० हून अधिक लोक गंभीर जखमी झाले होते.

दरम्यान तालिबान सरकारच्या आपत्कालीन यंत्रणा घटनास्थळी पोहोचल्या असून बचावकार्य वेगाने सुरू आहे. ढिगाऱ्याखाली अडकलेल्या लोकांना बाहेर काढण्यासाठी स्थानिक नागरिक, स्वयंसेवक आणि सुरक्षा दल मदतकार्य करत आहेत.