धक्कादायक! ४२६ विद्यार्थ्यांच्या जेवणात फिनाईल मिसळलं, शिक्षकाचा अजब कारनामा, संतापजनक कारण समोर

छत्तीसगडमधील सुकमा जिल्ह्यातून एक धक्कादायक बातमी समोर येत आहे. पाकेला पोर्टा केबिन निवासी विद्यालयात तब्बल ४२६ विद्यार्थ्यांच्या जेवणात फिनाईल मिसळल्याचा संतापजनक प्रकार उघडकीस आला. या प्रकरणाची माहिती पोलिसांना मिळताच त्यांनी घटनास्थळी धाव घेतली. आरोपी शिक्षक असून, त्यांना १४ दिवसांची न्यायालयीन कोठडी सुनावण्यात आली आहे. या घटनेनंतर परिसरात खळबळ उडाली आहे.

धनंजय साहू असे आरोपी शिक्षकाचे नाव आहे. पोलीस तपासातून समोर आलेल्या माहितीनुसार, आरोपी शिक्षक धनंजय साहू आणि वसतिगृह अधीक्षक दुजल पटेल यांच्यात गेल्या वर्षभरापासून वाद सुरू होता. याआधी साहू अधीक्षक पदावर होता. मात्र, एका विद्यार्थ्याला मारहाण गंभीर जखमी केल्यानं त्यांना या पदावरून हटवण्यात आले.

त्यानंतर दुजल पटेल यांची अधीक्षक म्हणून नियुक्ती करण्यात आली. याच रागातून बदला घेण्यासाठी साहू यांनी विद्यार्थ्यांच्या जेवणात फिनाईन मिसळल्याचा प्रकार समोर आले. ही धक्कादायक घटना समोर आल्यानंतर प्रशासनाने जलद पावले उचलण्यास सुरूवात केली.

कलेक्टर देवेश कुमार ध्रुव यांनी आरोपी शिक्षक धनंजय साहू यांना निलंबित केलं. अधीक्षक दुजल पटेल यांनाही पदावरून हटवून समग्र शिक्षण विभागात हलवले आहे. सहाय्यक अधीक्षक गौतम कुमार ध्रुव यांनाही हटवण्यात आले. त्यांना माध्यमिक शाळेत पाठवण्यात आले आहे. त्यांच्या जागी भवसिंग मंडावी यांची नवीन अधीक्षक म्हणून नियुक्ती कऱण्यात आली आहे.

न्यायालयीन कारवाई

सुकमा जिल्ह्याचे एसपी रोहित शाह यांनी दिलेल्या माहितीनुसार, विद्यार्थ्यांच्या जीवाशी खेळणाऱ्या या शिक्षकाला अटक करून न्यायालयात हजर करण्यात आले आहे. त्यांना १४ दिवसांची न्यायालयीन कोठडी सुनावण्यात आली आहे.