आमदाराच्या मुलाच्या घराबाहेर आढळला मोलकरणीचा मृतदेह, शरीर अन् चेहऱ्यावर जखमा; नेमकं काय घडलं?

मध्यप्रदेशच्या टिकमगड जिल्ह्यातील खरगापूर गावातून एक धक्कादायक बातमी समोर येत आहे. काँग्रेस आमदाराच्या मुलाच्या बंगल्याबाहेर एका २० वर्षीय मुलीचा मृत्यू झाला. बंगल्याच्या मागील भागात आंब्याच्या झाडाला लटकलेल्या अवस्थेत तरूणीचा मृतदेह आढळला. मृत तरूणीच्या चेहऱ्यावर जखमांच्या खुणा होत्या. सिव्हिल लाईन पोलीस स्टेशनने मृतदेह पोस्टमॉर्टमसाठी पाठवले. तसेच तपास सुरू आहे.

सोमवारी सकाळी ८ वाजण्याच्या सुमारास ही घटना घडली. काँग्रेस आमदार चंदा सिंह गौर यांचे पुत्र अभियंत सिंह गौर यांच्या बंगल्याबाहेर मुलीचा मृतदेह सापडला. याबाबत अभियंत सिंह गौर यांना या घटनेबाबत माहिती विचारण्यात आली. त्यांनी सांगितलं की, 'घटनेच्या दिवशी मी जिल्हा मुख्यालयाबाहेर दिल्लीत होतो. माझी पत्नी आणि १७ वर्षांचा मुलगा घरी होते. त्यांनी फोनवरून यासंदर्भात माहिती दिली.'

'घटनेच्या दुसऱ्या दिवशी मी घरी पोहोचलो. तरूणीनं आत्महत्येचं पाऊल का उचललं? तिनं आयुष्य का संपवलं? याबाबत कोणतीही ठोस माहिती समोर आलेली नाही. तिच्याकडे ना फोन होता, ना कधी नाराज असलायची. घरात कायम आनंदात असायची. ती ५ वर्षांची असल्यापासून आमच्यासोबत होती. ती मोलकरीण नव्हती. तर ती मुलीसारखी होती. आम्ही तिच्या लग्नासाठी जोडीदारही शोधत होतो, असं अभियंत म्हणाले.

मृत सपनाचे वडील भोला रायकवार हे उत्तर प्रदेशातील महोबा जिल्ह्यातील बेलाटल येथील रहिवासी आहेत. घटनेनंतर घटनास्थळी तरूणीची आई आली. पण तिनं पोलिसांना अद्याप कोणताही जबाब दिलेला नाही. पोलिसांनी घटनास्थळी धाव घेतली असून, पोस्टमार्टम रिपोर्ट आणि मृतांच्या कुटुंबियांच्या जबाबांवरून शोध घेतला जाणार असल्याचं पोलिसांनी सांगितलं.