Chennai News : iPhone पडला दानपेटीत, परत करण्यास मंदिराचा नकार; युवकाला मिळालं फक्त सिम कार्ड

Chennai iPhone Case : मंदिरात देवदर्शनानंतर बरेचसे लोक तेथे असलेल्या दानपेटीमध्ये आपल्या इच्छेनुसार पैसे दान करत असतात. काहीजण दान म्हणून पैसे देतात, तर काहीजण महागड्या गोष्टी अर्पण करत असतात. दरम्यान दानपेटी आणि दान देण्यासंबंधित एक आगळीवेगळी घटना समोर आली आहे. चैन्नईच्या अरुलमिगु कंदास्वामी मंदिरामध्ये एका तरुणाचा आयफोन चुकून दानपेटीमध्ये पडला. पुढे त्याने मंदिराच्या विश्वस्ताकडे फोन परत करण्याची विनंती केली. पण तरुणाची विनंती नाकारत आयफोनमधील सिमकार्ड परत केले.

तामिळनाडूच्या विनायकपुरम येथे राहणारा दिनेश मागच्या महिन्यात त्याच्या कुटुंबासह अरुलमिगु कंदास्वामी मंदिरामध्ये गेला होता. देवाचे दर्शन घेतल्यानंतर पैसे दान करायला म्हणून तो दानपेटीजवळ गेला. खिशातून पैसे काढत असताना अनावधानाने त्याचा महागडा आयफोन दानपेटीमध्ये पडला. दानपेटीच्या उंचीमुळे त्याला आयफोन काढणे शक्य झाले नाही.

झालेला प्रकार दिनेशने मंदिराच्या विश्वस्त पदाधिकाऱ्यांना सांगितला. तेव्हा 'दानपेटीमध्ये गेलेली प्रत्येक गोष्ट मंदिराची संपत्ती आहे.' असे विश्वस्तांनी दिनेशला सांगितले. नाईलाजाने दिनेश आयफोनविना घरी परतला. अरुलमिगु कंदास्वामी मंदिराच्या प्रथेनुसार, एका महिन्यात दोनदा दानपेटी खुली करण्यात येते. तेव्हा दानपेटी उघडण्याच्या वेळेस दिनेश मंदिरात पोहोचला आणि त्याने पुन्हा एकदा आयफोन परत करण्याची विनंती मंदिराकडे केली. यावेळेसही विश्वस्तांनी दानपेटीमध्ये गेलेली कोणतीही गोष्ट ही मंदिराची संपत्ती असल्याचे सांगितले. दिनेशकडून आयफोन चुकून दानपेटीमध्ये पडला असला तरीही तो परत करता येणार नाही, असेही म्हटले.

दिनेशने हिंदू धार्मिक संस्था आणि धर्मादाय एन्डॉमेंट्स कायद्याअंतर्गत तक्रार दाखल करत मंदिराने आयफोन परत करावा अशी मागणी केली. आयफोन न देता आम्ही तुला सिम कार्ड देऊ शकतो, जेणेकरुन तुम्ही फोनमधला महत्त्वपूर्ण डेटा परत मिळवू शकता असा पर्याय विश्वस्तांनी दिनेशसमोर ठेवला. पण तोपर्यंत दिनेशने नवीन सिम कार्ड विकत घेऊन त्याचा वापर सुरु केला होता.

दरम्यान, या प्रकरणावर मंदिराचे कार्यकारी अधिकारी कुमारवेल यांनी भाष्य केले. ते म्हणाले, "मंदिराच्या परंपरेनुसार दानपेटीमध्ये असलेली कोणतीही वस्तू ही देवाची संपत्ती आहे. त्यामुळे ती परत करता येणार नाही. कदाचित दिनेशने दान म्हणून आयफोन दानपेटीमध्ये अर्पण केला आणि नंतर त्याने निर्णय बदलला. दानपेटीला लोखंडी कुंपण असल्याने फोन त्यात पडणं कठीण आहे."