मायक्रोसॉफ्टचे संस्थापक बिल गेट्स यांच्याकडून मुंबई उच्च न्यायालयाने मागितले उत्तर, नेमकं काय आहे प्रकरण?

मुंबई: मुंबई उच्च न्यायालयाने (Mumbai High Court) भारत सरकार, सीरम इन्स्टिट्यूट ऑफ इंडिया, मायक्रोसॉफ्ट कंपनीचे संस्थापक बिल गेट्स आणि डीसीजीआय प्रमुखांना नोटीस पाठवली आहे. दिलीप लुणावत नावाच्या व्यक्तीने यांच्याविरोधात मुंबई उच्च न्यायालयात याचिका दाखल केली आहे. याचिकाकर्ते लुणावत त्यांची मुलगी डॉ. स्नेहल लुणावत यांचा कोरोना लस कोविशील्डच्या दुष्परिणामांमुळे मृत्यू झाला असल्याचा आरोप या याचिकेत केला आहे. आता यावर त्यांनी एक हजार कोटी रुपयांच्या नुकसानभरपाईची मागणी केली आहे.

दिलीप लुणावत यांनी आपल्या याचिकेत सरकार आणि या इतरांवर कोविड लसीशी संबंधित दिशाभूल करणारे तथ्य पसरवल्याचा आरोप केला आहे. या लसीच्या सुरक्षिततेबाबत चुकीचे दावे करण्यात आल्याचे त्यांचे म्हणणे आहे. आता मुंबई उच्च न्यायालयाने (Mumbai High Court) याचिकेशी संबंधितांकडून उत्तरे मागवली आहेत.

याचिकाकर्ते दिलीप लुणावत हे औरंगाबादचे रहिवासी आहेत. आपली मुलगीही डॉक्टर असल्याचे त्यांनी न्यायालयाला सांगितले. त्या एमएमबीटी डेंटल कॉलेज आणि हॉस्पिटल, धामणगाव येथे वरिष्ठ लेक्चरर होत्या. वैद्यकीय महाविद्यालयातील सर्व आरोग्य कर्मचाऱ्यांना कोरोनाची लस घेण्यास सांगण्यात आले. त्यानंतर त्यांच्या मुलीलाही ही लस घ्यावी लागली.

स्नेहल यांनी २८ जानेवारी २०२१ रोजी लस घेतली. काही दिवसांनंतर, स्नेहल यांना डोकेदुखी आणि उलट्या होऊ लागल्या. त्यामुळे त्यांना रुग्णालयात दाखल करण्यात आले. त्यांच्या मेंदूत रक्तस्त्राव होत असल्याचे त्यावेळी डॉक्टरांनी सांगितले. स्नेहल यांचा १ मार्च २०२१ रोजी मृत्यू झाला. या मृत्यूचे कारण लसीचा दुष्परिणाम असल्याचा दावा करण्यात आला आहे, असं या याचिकेत म्हटले आहे.

पुढील सुनावणी १७ नोव्हेंबरला होणार

न्यायमूर्ती एसव्ही गंगापूरवाला आणि न्यायमूर्ती माधव जामदार यांच्या खंडपीठाने २६ ऑगस्ट रोजी याचिकेवर सर्व प्रतिवादींना नोटीस बजावली. १७ नोव्हेंबरला या प्रकरणाची पुढील सुनावणी होणार आहे. २ ऑक्टोबर २०२१ रोजी लसीकरणानंतरच्या प्रतिकूल घटनांवरील केंद्र सरकारच्या समितीने सादर केलेल्या अहवालावर ही याचिका आधारित आहे. याचिकेत सीरम इन्स्टिट्यूट ऑफ इंडियाकडून १,००० कोटी रुपयांची भरपाई मागितली आहे.