भाजपला सर्वात मोठा धक्का; मुख्यमंत्र्यांचं डॅमेज कंट्रोल निष्फळ, माजी मंत्र्याने साथ सोडत काँग्रेसचा 'हात' पकडला

आसाम विधानसभा निवडणुकीदरम्यान भाजपला मोठा धक्का बसला आहे. हिमंत सरकारमध्ये क्रीडा मंत्री राहिलेल्या नंदिता गरलोसा यांनी अधिकृतरित्या काँग्रेसमध्ये प्रवेश केला आहे. भाजपकडून तिकीट नाकारल्यानंतर त्यांनी काँग्रेस पक्षात प्रवेश केला. नंदिता आता काँग्रेसकडून हाफलोंग विधानसभा मतदारसंघातून लढणार असल्याचे निश्चित झालं आहे.

आसामच्या काँग्रेस कमिटीमधील वरिष्ठ नेत्यांच्या उपस्थितीत नंदिता गरलोसा काँग्रेसमध्ये प्रवेश केला. यावेळी काँग्रेसचे प्रदेश महासचिव निर्मल लंहथासा यांनी म्हटलं की, 'आम्हाला आनंद होत आहे की, नंदिता गरलोसा यांनी काँग्रेसमध्ये प्रवेश केला. गेल्या ५ वर्षांपासून त्यांचा आवाज दाबण्याचा प्रयत्न केला जात होता. परंतु त्या त्यांच्या सिद्धांतावर ठाम राहिल्या. भाजपला आता त्याची किंमत चुकवावी लागेल. कारण हिमंत बिस्वा सरमा यांना आदिवासी समाजाच्या जमिनी बड्या कंपन्यांना विकण्यात अधिक रस आहे'.

निर्मल पुढे म्हणाले, 'काँग्रेस उद्या त्यांना हाफलोंग विधानसभा मतदारसंघातून उमेदवार म्हणून घोषित करतील. त्याची प्रक्रिया लवकरच पूर्ण होईल'. गरलोसा या आसाम सरकारमध्ये क्रीडा आणि युवा कल्याण मंत्री होत्या. त्या हाफलवोंग विधानसभा मतदारसंघाचं प्रतिनिधीत्व करत होत्या. भाजपने त्यांच्या ऐवजी रुपाली लांगथासा यांना तिकीट दिलं. त्यामुळे नंदिता यांनी भाजप सोडली.

मुख्यमंत्री हिमंत बिस्वा सरामा यांनी नंदिता यांनी नाराजी व्यक्त केल्यानंतर हाफलोंग येथील घरी जाऊन समजूत काढण्याचा प्रयत्न केला. परंतु त्याचा काही फायदा झाला नाही. मुख्यमंत्री सरमा यांच्यासोबत बैठक झाल्यानंतर काही तासांत त्यांनी काँग्रेसमध्ये प्रवेश केला. आसाममध्ये १२६ विधानसभा मतदारसंघ आहेत. यासाठी ९ एप्रिल रोजी मतदान होणार असून ४ मे रोजी निकाल जाहीर होईल.