IAS Transfer : मोठा प्रशासकीय फेरबदल! २३ IAS अधिकाऱ्यांच्या तडकाफडकी बदल्या, कुणाची कुठे नियुक्ती?

बिहारमधून मोठी बातमी समोर आली आहे. सरकारने राज्यातील प्रशासकीय व्यवस्था अधिक सक्षम करण्याच्या उद्देशाने मोठा प्रशासकीय फेरबदल केला आहे. प्रशासन विभागाने जारी केलेल्या अधिसूचनेनुसार, एकाच वेळी २३ IAS अधिकाऱ्यांच्या बदल्या करण्यात आल्या आहेत. या फेरबदलात जिल्ह्यांतील उप विकास आयुक्त (DDC), अनुमंडल पदाधिकारी (SDO) तसेच नगर आयुक्तांच्या जबाबदाऱ्यांमध्ये मोठे बदल करण्यात आले आहेत.

या बदल्यांमध्ये काही महत्त्वाच्या पालिकांना नवे अधिकारी मिळाले आहेत. दानापूरचे SDO अनिरुद्ध पाण्डेय यांची पूर्णिया पालिकेच्या आयुक्तपदी नियुक्ती करण्यात आली आहे. तर चर्चेत असलेल्या IAS अधिकारी गरिमा लोहिया यांच्याकडे दरभंगा पालिकेच्या आयुक्तपदाची जबाबदारी सोपवण्यात आली आहे. पूर्णियाचे माजी SDO तुषार कुमार यांची मधुबनीचे नवे DDC म्हणून नियुक्ती करण्यात आली आहे. IAS अधिकारी विग्नेश टीए यांना पूर्णियाचे नवे SDO करण्यात आले आहे.

विकासकामांना वेग देण्यासाठी अनेक जिल्ह्यांमध्ये नव्या DDC अधिकाऱ्यांची नियुक्ती करण्यात आली आहे. श्रेया श्री यांना खगडिया, तुषार कुमार यांना मधुबनी, आकांक्षा आनंद यांना सासाराम आणि नेहा कुमारी यांना कटिहारचे DDC करण्यात आले आहे. जमुईच्या DDC पदासाठी रोहित कर्दम/शिप्र विजयकुमार चौधरी यांची नियुक्ती नमूद करण्यात आली आहे. दरम्यान, उद्योग विभागातील संचालकपदी प्रधुम्न सिंह यादव, समाज कल्याण विभागाच्या संचालकपदी अंजली शर्मा आणि मद्यनिषेध, उत्पाद व निबंधन विभागाच्या महानिरीक्षकपदी कृष्ण चंद्र गुप्ता यांची नियुक्ती करण्यात आली आहे.

अनुमंडल स्तरावरही मोठे बदल झाले असून, विरूपाक्ष विक्रम सिंह यांना दानापूर, प्रिया रानी यांना सासाराम, कछिश बक्शी यांना पटना सिटी, कृष्णा जोशी यांना बाढ आणि अजय यादव यांना बेगूसरायचे SDO करण्यात आले आहे. याशिवाय मढौरा, हवेली खडगपूर, कटिहार, शेरघाटी, नौगछिया आणि तारापूर येथेही नव्या SDO अधिकाऱ्यांची नियुक्ती झाली आहे. या यादीत २०२२ आणि २०२३ बॅचच्या अधिकाऱ्यांसोबत २०२४ बॅचच्या प्रशिक्षणार्थी IAS अधिकाऱ्यांनाही फील्ड पोस्टिंग देण्यात आली आहे. सर्व अधिकाऱ्यांना त्यांच्या नव्या पदावर तातडीने रुजू होण्याचे निर्देश सरकारने दिले आहेत.