Bhagalpur Boat Accident: गंगा नदीत 18 मजुरांना घेऊन जाणारी बोट बुडाली; 6 जण बेपत्ता

बिहारमधील भागलपूर जिल्ह्यातील गंगा नदीत मुजरांची बोट बुडाली असून या बोटीमध्ये १८ मजूर होते. नौगछिया पोलीस जिल्ह्याच्या कार्यक्षेत्रात येणाऱ्या खरिक ब्लॉकमधील राघोपूर पंचायतीच्या हद्दीत आज ही दुर्घटना घडलीय. गंगेच्या वाढत्या पाणीपातळीत आणि वेगवान प्रवाहात नदीकाठच्या बांधाच्या संरक्षण काम करण्यासाठी हे मजूर जात होते.

नदीतून प्रवास करताना मजुरांची ही बोट अचानक नियंत्रणाबाहेर गेली आणि नदीच्या मधोमध उलटली. नौका उलटताच घटनास्थळी आरडाओरडा आणि गोंधळ उडाला. या घटनेचा एक हृदयद्रावक व्हिडिओही सोशल मीडियावर वेगाने व्हायरल होतोय. राघोपूर पंचायत हे बिहार सरकारचे ऊर्जामंत्री शैलेश कुमार, ऊर्फ बुलो मंडल यांचे मूळ गाव आहे. गेल्या काही दिवसांपासून गंगेचा मुख्य प्रवाहात वाढ झालीय. काझिकोराईया-राघोपूर जमीनदारी किनाऱ्यारवरील तटावर प्रचंड दबाव वाढलाय.

किनाऱ्यावरील तट फुटण्यापासून वाचवण्यासाठी जलसंपदा विभागाच्या सूचनांनुसार कंत्राटदाराकडून मोठ्या प्रमाणावर पूर-संरक्षणाचे काम केले जातंय. या कामाचा एक भाग म्हणून, भागलपूर जिल्ह्यातील विविध भागांतील मजूर आणि बांधकामाचे साहित्य बोटीतून नदीपलीकडे नेत होते. त्याचवेळी प्रवाहाच्या जोरदार वेगामुळे त्या बोटीचं नियंत्रण गेलं आणि बोट उलटली.

१२ कामगार सुखरूपपणे किनाऱ्यावर पोहोचले

मिळालेल्या माहितीनुसार, बोटीवर एकूण १८ कामगार होते. बोट उलटताच अनेक कामगारांनी पोहून स्वतःचा जीव वाचवण्याचा प्रयत्न केला, त्यापैकी १२ जण पोहत सुरक्षितपणे नदीकाठावर पोहोचले. उर्वरित सहा कामगार नदीच्या प्रबळ प्रवाहामुळे वाहून गेले असावेत किंवा ते बेपत्ता झाले असावेत, अशी भीती व्यक्त केली जातेय. एसडीआरएफचं पथ त्यांचा शोध घेत आहे.

या घटनेची माहिती मिळताच स्थानिक प्रशासन, पोलीस दल आणि एसडीआरएफ (SDRF) चे पथक मोटारबोटी व लाइफ जॅकेट्ससह तातडीने घटनास्थळी दाखल झाले. गंगा नदीच्या वेगवान प्रवाहामध्ये बेपत्ता कामगारांचा शोध घेण्यासाठी तज्ज्ञ पाणबुड्यांच्या मदतीने व्यापकपद्धतीने बचावकार्य सुरू आहे. बोटीमध्ये कंत्राटदार धूप-प्रतिबंधक काम करत होते. त्यात विविध भागांतील मजूर सहभागी होते.