MLA रेस्ट हाउसमध्ये खळबळ; काँग्रेस आमदाराच्या रूममध्ये तरुण-तरुणी आक्षेपार्ह अवस्थेत आढळले, राजकीय वर्तुळात खळबळ

मध्य प्रदेशची राजधानी भोपाळ येथील आमदारांच्या विश्रामगृहात (MLA Rest House) सुरक्षेचा मोठा प्रश्न ऐरणीवर आला आहे. महिदपुरचे काँग्रेस आमदार दिनेश जैन बोस यांच्या अधिकृत खोलीत त्यांच्या अनुपस्थितीत एक तरुण आणि तरुणी आढळल्याची धक्कादायक घटना समोर आली आहे. या प्रकारानंतर संबंधित वर्तुळात मोठी खळबळ उडाली. या प्रकरणी विधानसभा सचिवालय आणि लोक निर्माण विभागाकडे (PWD) अधिकृत तक्रार दाखल करण्यात आली आहे. आज तकने याबाबतचे वृत्त दिलं आहे.

नेमकं काय घडलं?

मिळालेल्या माहितीनुसार, काँग्रेस आमदार दिनेश जैन बोस यांना विश्रामगृहातील ब्लॉक-३ मधील रूम नंबर १४ आणि १५ अलॉट करण्यात आली आहे. २ नोव्हेंबर रोजी आमदार दिल्लीवरून परतल्यानंतर दुपारी २ वाजता विश्रामगृहात पोहोचले. त्यांनी केअरटेकरकडे रूम नंबर १५ ची चावी मागितली, पण ती उपलब्ध नसल्याने त्यांना रूम नंबर १४ ची चावी देण्यात आली.

आमदार जेव्हा रूम नंबर १४ मध्ये गेले, तेव्हा त्यांना बाजूच्याच रूम नंबर १५ मधून काही संशयास्पद हालचाल जाणवली. त्यांनी पाहिलं असता, त्या खोलीमध्ये एक तरुण आणि तरुणी आक्षेपार्ह स्थितीत असल्याचे निदर्शनास आले. आमदारांना अचानक समोर पाहताच ते दोघेही घाबरून तिथून पळून गेले.

आमदार आक्रमक, प्रशासनाकडे तक्रार दाखल:

आपल्या नावावर असलेल्या आणि कुलूपबंद असणाऱ्या शासकीय खोलीत परवानगीशिवाय बाहेरची व्यक्ती कशी पोहोचली, असा संतप्त सवाल आमदारांनी उपस्थित केला आहे. कोणतीही पूर्वकल्पना, परवानगी न देता केअरटेकरने रिसेप्शनवरून खोलीची चावी दुसऱ्या कोणालातरी कशी दिली, यावर त्यांनी आक्षेप घेतला आहे.

या संपूर्ण प्रकाराची गंभीर दखल घेत आमदार दिनेश जैन बोस यांनी विधानसभा सचिवालय आणि प्रमुख सचिवांना पत्र लिहून कठोर कारवाईची मागणी केली आहे. सध्या PWD या प्रकरणाची सखोल चौकशी करत असून व्हीआयपी विश्रामगृहांच्या सुरक्षेचा मुद्दा पुन्हा एकदा ऐरणीवर आला आहे.