American Airlines: १७८ प्रवासी असलेल्या विमानाला भीषण आग; लँडिंग करताच फ्लाइटने घेतला पेट

अमेरिकेच्या डेन्व्हर आंतरराष्ट्रीय विमानतळावर उतरलेल्या फ्लाइट 1006 ला भीषण आग लागली. गुरुवारी संध्याकाळी हे विमान विमानतळावर उतरल्यानंतर त्याच्या इंजिनने पेट घेतला. या विमानात १७८ प्रवाशांसह ६ क्रू मेंबर होते. मिळालेल्या माहितीनुसार, हे विमान डॅलस-फोर्ट वर्थ आंतरराष्ट्रीय विमानतळाकडे जाणार होते, परंतु इंजिनमध्ये बिघाड झाल्यामुळे ते डेन्व्हरला वळवण्यात आलं. विमान सुखरूप उतरले मात्र C-38 गेटवर उभे राहिल्यानंतर इंजिनमधून धूर निघू लागला, त्यामुळे प्रवाशांना तातडीने बाहेर काढण्यात आले.

विमानतळावरील अधिकारी आणि अमेरिकन एअरलाइन्सच्या निवेदनानुसार, विमान एअरपोर्टवर उतरल्यानंतर टरमॅकवर धूर उडू लागला. त्यानंतर आग लागल्याची माहिती झाली. त्यावेळी विमानात १७८ प्रवाशी आणि ६ क्रू मेंबर होते. विमानाला आग लागल्याच समजताच विमानातील सर्व प्रवाशांना सुरक्षित बाहेर काढण्यात आले आणि टर्मिनलवर नेण्यात आले.